Ka Raij Jowai ynne ka 24 tarik hapoh i pait i yoo ka Dorbar Niam da pyndep ko ya ka lehniam Thohlangdoh ha ryngkat i chimbyntalang ki chakri niam ka Raij nadooh u Dolloi, Pator, Langdoh, ki Sangot, ki Wasan, ki Phra Kur wa ki khon ka Raij.
Kani ka lehniam toh chibynta wow engooh ya u Blai Langdoh neibynta i kyrkhu wa da yoh wei leh kam chibynta wow pynkyntang ki khon ka Raij ya ka Bei Rymaw kawa theh ya i kyrkhu ha waroh ki liang.
Ya ka lehniam næ kñia engooh hakhmat ka duwan u Moo Langdoh da pyndep da u Sangot Paswet ryngkat i synraan u Sangot Pakyntein wa u Sangot Pasubon kiwa man ki le Sangot yong ka pateiñ ki khon pateiñ ki ksu pateiñ ka Kur Sookpoh Khatar Wyrnai.
Neiliang u Dolloi u Puramon Kynjing kam u khlieh ka niam khlieh ka Elaka hawa klam da khana u ya ka yurim wa pyndep ya kani ka niam ha kani ka sngi toh wow pynyoo wa ki khon ka Raij ka chnong pynyoo ki yei burom wei kheiñkor ya ka Bei Rymaw kawa theh i kyrkhu ya ki bru ha waroh ki liang wei ha kani ka sngi katkam ka adong niam ki khon ka Raij ymhoi wow kreh næ ktah ki ya kiwon kiwon ki kaam kiwa pynjæd pynsihdur ya ka Rymaw wa ki soodong sookun yong ka.
Chooh chooh neiliang u Dolloi da e u leh i kitbok kitrwiang wa ki kyntien e mynsien ya waroh ki khon ka Raij, ka Elaka ka ri wa ka jaitbru wa kamwa ka Raij Jowai da pyndep ko ya kani ka lehniam ynne ka sngi hapyrdi i chongkun chongblai, kyrmen u wow ye leh u pyndep ya kiwi ki kaam niam hapoh ka Raij ka Elaka ha ka yurim yong ka Chaad Niam Behdieñkhlam u man ki kiwa lai bait lai ryntih wa kiwa phooh wa phieñ.
