Ynne ka 25 tarik, ka Chutwakhu waka 4-Mowkaiaw United da jop ki haka Open to All Cricket Tournament ka AJCA wa pynman ha madan Jrisaleiñ, Jowai.
Ka Chutwakhu da jop ko ya ka Ummulong da 53 Run hadien wa jop ko yaka kylla-khlem wei da Bat nyngkong ko heiwa da kamai ko 202 Run na ki 20 Over deiwa dooh 5 Wicket.
U Armorando Shullai da kamai u 71 Run (7×4 wa 5×6) khlem haap, u Christobell Shullai won da ye u kamai 32 Run (5×4) khlem haap. U Redoland R Shylla na ka Ummulong da yoh khur u 2 Wicket na ki 4 Over. Ka Ummulong hawa beh yei thong da ye ko u kamai 149 Run na ki 20 Over deiwa dooh 9 Wicket. U Carefully Gassah da kamai u 26 Run (2×4 wa 2×6), u Rejoice Gassah won da ye u kamai u 22 Run (5×4). U Ricky Shullai wa u Unipaya Pala yong ka Chutwakhu da yoh ki u pynhaap mar 3 Wicket samen na ki 4 Over.
Ka Chutwakhu waka Ummulong na ki 4 sien ki yalehke, da jop ki mar ar sien wei i rem leh i jooh.
Haka yalehke wa bood, ka 4-Mowkaiaw United da jop ko yaka Hills United Cricket Club da 2 Run.
Ya ka kylla-khlem da jop da ka 4-Mowkaiaw United wei da jied ko wow Bat nyngkong heiwa da kamai ko 162 Run na ki 20 Over deiwa dooh ko 6 Wicket. U Eleazer Dkhar da kamai u 62 Run (9×4 wa 3×6), u Bundaki Lathong won da ye u kamai 27 Run (4×4 wa 1×6)). U Edify Patwet na ka Hills United Cricket Club da yoh u wow pynhaap 2 Wickets na ki 4 Over.
Ka Hills United Cricket Club hawa beh ya i thong da ye ko u kamai 160 Run na ki 20 Over deiwa dooh 4 Wicket. U Yoohimitre Patwet da kamai u 55 Run (4×4 wa 4×6), u Pher Dkhar won da ye u kamai u 45 (9×4). U Eleazer Dkhar wa u Toodansoon Rymbai na ka 4-Mowkaiaw United da yoh ki wow pynhaap mar 2 Wicket samen na ki 4 Over.
Na ka 4 sien ki yalehke, ka 4-Mowkaiw United da jop ko ha waroh wei da psiah ko cha ka Semifinal, katwa ka Hills United da yaleh ko la 3 sien wei da jop ko dang chisien.
Ki yalehke mynstep ka sngi (26-03-2021) u man ko hapyrdi ka Rising Star wa ka Umchangiar heipor 9:00 waje i step, katwa ka yalehke wa bood u man ko hapyrdi ka Khliehtyrshi Sports Club pyrchah yaka Moodymmai.
