U Symbood Montri Rangbah ka jylla, u Prestone Tynsong ynne ka sngi da ong u wa ka UDP da leh ko da i rukom wa biang hajrong i dawa pyndam noh ya u James PK Sangma na ka chnat Bordiñ, deiwa phah bait da ka chithi cha u Montri Rangbah ka jylla, u Conrad Kongal Sangma uwa man leh u Chairman ka MDA Coordination Committee.
U Prestone ynnin da ong u wa i dawa pyndam noh ya u James Sangma kam u Montri Bordiñ da u General Secretary ka UDP u Jemino Mawthoh, yoo la kamwa ym pu tip neiliang kiwi ki dkhot ka Party wa kynthup ya ki MLA kiwa emlang ha sorkar, tangwa ynne ka sngi da ong won u wa i leh yong ka UDP wow phah bait da ka chithi cha u Montri Rangbah ym kamwa leh da ka BJP kawa da pynsñiaw bait cha ki laad pathai khubor.
Neiliang u General Secretary ka United Democratic Party, u Jemino Mawthoh da phah u da ka chithi cha u Montri Rangbah ka jylla wow dawa pynhiar chuki noh ya u James na i kaam Montri yong ka chnat Bordiñ hajrong i dap ram wa ki kynrum kynram ha i liang ki kaam poisa ka chnat. Hadien ini i dawa u Jemino, neiliang ki MLA ka UDP wa kynthup leh ya u President, u Metbah Lyngdoh da pynbaad ki wa i dawa toh iwa khlem tip, tangwa neiliang u Working President wa kynthup ya u Bindo M Lanong, u Titosstarwell Chyne, u Paul Lyngdoh wa u Vice-President u Alantry F Dkhar kiwa kyrchaan ya ini i rai da pynksan ki yei leh u General Secretary wa ym em leh u samen.
Hawa kylli, u Prestone da pynsñiaw wa yahap u ya iwa klam u Metbah uwa da ong wow khut ya ka yalang yong waroh kiwa yahkhmat ka UDP. U Prestone da ong u leh wa u rap bha ya ka UDP wow pynbait chwa para ki wei wow wanrah won ya i rai hakhmat ka Coordination Committee
