Ynne ka sngi da pynman ya ka State Level Seminar & Workshop namo ka esikai wa da mang kyrpang neibynta ki le tylli ki District yong ka West Jaiñtia Hills, East Jaiñtia Hills wa ka East Khasi Hills District wei da pynman ya ka ha District Library Auditorium Jowai dei wan chimbynta ki bru warep wa kiwa sumaar ya kiwa kjut dei stat yongrim.
Ha ka yalang yahkhmat wa tbian yong kani ka sngi, ka Niman Laloo, Divisional Forest Officer, Social Forestry Division da man ko kam ka chongknor heiwa da yoh leh yei klam i batai hajrong ka thong yong kani ka esikai.
U R. Lawai, Technical Assistant Meghalaya State Medicinal Plants Board, Shillong da ong u wa ka thong wa pynman ya kani ka esikai toh wow pynchlur ya ki bru warep wa kiwa e dawai yongrim heiyatoh kammon u tip ki u yada wei u pynneh pynsah ya kitæ ki jait phlang, jait dieñ, jait soh kiwa chim ki u pynemkaam heiyatoh wow chna dawai, wei da khana chooh chooh u leh wa neiliang ka chnat em ko ki laad yarap lada ki bru warep næ kiwa e dawai rep ki ya kitæ ki jait phlang dawai.
U R. Nainamalai, Divisional Forest Officer, Jaiñtia Hills Division hawa klam kam u kongsan da khana u ya ki jait dieñ næ ki jait phlang wa ye u yoh hapoh ki chnong ki thaw wei da khana u leh wa hapoh ka jylla Meghalaya em 8 jait ki jait dieñ, jait sla kiwa ye u chna dawai kiwa ha kiwi ki thaw yong ka Ri India ym ye ki u yoh næ u chem ya ki. Khaddooh chwa wow chong, kyrsu kyntu u ya ki warep wa ya kiwa e dawai yongrim wow yaleh ki u pynneh pynsah ya kitæ ki jait phlang kiwa ye u chna dawai deilang wow booh hei thoh i taar khnang wa ka pateiñ u tip ki u bood u ksoh wei u pynneh pynsah yeini i rukom e dawai yongrim.
Ki bru stat, bru chemphang kiwa da e i klam i batai wa bniah ya ki warep wa ki nong e dawai yongrim ha ki ar bynta yong kani ka prokram toh u Thomas Iangjuh, Junior Scientist Bio Resource Development Centre, Shillong, u Dr. H.C. Pakyntein, President Jaintia Indigenous Medicine Association, u S. Suting Consultant Meghalaya State Medicinal Plants Board, Shillong, u Dr. K. Makdoh, Assistant Professor Lady Kean’s College Shillong wa u R. Lawai, Technical Assistant Meghalaya State Medicinal Plants Board, Shillong.
