Neiliang ki waheh chnong kiwa em hapoh ka Raij Nongjngi hadien wa yoo ki wa em wa pynmih khubor haka 31-03-2021 hawa yatoh wa i chah tynyap uwi u bru wa tip kam u Moris Lamin haka chnong Takhniang, da pynsñiaw ki yei phylla wei lyngngoh ya ki kam kiwa yahkhmat chnong neibhah katkam ki khubor wa da mih, uni u bru wa chah tynyap toh uwa na ka chnong Nongjngi Khliehriat (iwa ym em kam ini i chnong), hei yong sakhiat toh uwa na ka Moriap, Elaka Mynso uwa chongkha ha Khliehriat.
Kamtæ da ong wa ini i mih khubor da pynkulmar wei da pynbood naam yaka chnong heiwa da suba wa ki damok wa tynyap ya utai u bru toh kiwa na Nongjngi, wei kam kiwa yalam chnong ym che ki ha kawon ka chnong wa em kitai ki damok neibhah ka Raij Nongjngi toh kawa em ki yong ki hi ki Dorbar Chnong.
Hajrong ini da kyrpaad ya kiwa thoh khubor wa kiwa e khubor wa ym toh wow pynbood naam yaka chnong lada ym ye wow thoh da iwa che wa tikna.
Kamtæ da pynche wa ka Nongjngi toh ka Elaka waka Raij Nongjngi wei ka Headquarter yong ka Elaka Nongjngi. Hapoh ka Raij Nongjngi em ki Dorbar Chnong wei kitæ toh ka 1. Lumlyngdoh Nongjngi, 2. Khliehshnong Nongjngi, 3. Moolephaw, 4. Iongthma, 5. Iangkar, 6. Lumtrep wa 7. Ionglwit.
Hapoh ka Raij Nongjngi ym em kam katæ ka Dorbar Chnong Nongjngi katkam ka khubor wa da mih ha u Rupang neibhah wa em jar jiar ki Dorbar Chnong, pynkut ka kyrwoh na ki waheh chnong ka Raij Nongjngi.
