Ynnin ka 3 tarik, ka KSU Jowai Unit da pynhaap pyrda ko yaka Tiger 7 Football Tournament heiwa yaka Final da rah daka Riatsaliya FC deiwa jop yaka New Born FC da 2-0.
Ha kani ka sngi da emlang leh u President ka KSU Jaiñtia Hills District u Ohibait Dkhar uwa man leh kam u kongsan ha kani ka sngi deiwa emlang leh u President ka KSU Jowai Circle u Ioanis Suchiang wei naka Jowai Unit da wan u Ewanmi Phawa uwa man u President ka Jowai Unit, u General Secretary u Solangki Paslein, u Secretary Sport u Phrangki Chyrmang, u Publicity Secretary u Nidapoi Shadap wa ki kattu katni ngut ki dkhot.
Neiliang u kongsan da pynkynmoo u ya kiwa yalehke Sports wa ym toh u man kiwa sñiawsarong wei lada man ki kiwa jop lane kiwa rem leh, ym toh wow sñiawrem wei toh wow em i mynsien yaleh yow poi cha ka thong.
Da ong u leh wa kam kiwa yaleh Sports ym toh wow chah eiñ ha ki dih pynmuaid næ ki kynja Drugs kiwa pynsih ya i doh i pran wa i chait i khiah.
