I ku dor syndet i doh masi da T. 50 i doh wa khleh chyieñ wei T. 100 i doh pasoh ha East Khasi Hills khamtam ha Shillong da pynphylla ko ya kiwa boon ki paidbah.
Ya i dor i doh masi da pynku nadooh ka 10 tarik u Wisu na ka T. 400 tyngka chi kilo cha ka T. 450 i doh wa khleh chyieñ katwa i doh pasoh won da ku i na ka T. 500 cha ka T. 600 chi kilo.
Neiliang ka Deputy Commissioner ka EKH District, ka Isawanda Laloo, da ong ko wa da yoh ya i ujor na ki paidbah wei da thung leh ya ka Committee wow thooh bniah ha ka 15 Wisu heiwa ya ka bui e yumut da phah leh cha ka chnat Veterinary & Animal Husbandry.
Ka DC da ong ko leh wa da emkaam wow thung noh da ka ‘Price Fixation Committee’, neibhah wa katkam wa man hi katni ym em kam kani ka Committee yow kheiñsap yei lut i sep liang wanang hadooh chwa wow dai yei doh khnang wow lait na i chah chim kabu.
Da ong ko leh wa i daw wa ku syndet i dor katkam ka bui toh wa duna i em ki masi wei chong leh ha i ku wei hiar dor ki masi cha baar jylla wei da chem wa ya i dor da antaad donhi khlem pait ya i khia ka masi.
Chooh chooh da ong ko wa hadooh katni ym em i yapynbait deiwa pynrap wa emkaam wow pynkhlan ya i thaw ah doh wa em ha Mawiong.
Heijooh i por ka DC da ong ko leh wa ka chnat toh u pait ko ya i dor i doh masi nadooh ha yaw masi hadooh wa poi cha dukan khnang wow suk ki paidbah.
