Ynne ka sngi ka yung krehkaam u District Medical & Health Officer, West Jaiñtia Hills chirup wa ka Department of Ayush da lehwarom ko ya ka World Homeopathy Day, hajrong ka phang “Homoeopathy- Roadmap for Integrative Medicine”.
Ya kani ka yalang da pynman ha Yungwalieh, ka Tpep Pale, Jowai heiwa ka ADC, ka D. Syngai da man ko kam ka kongsan wei da pynlai ya ka da ka Dr. Bisolin Dhar wei da yoh ya ki kyntien pdiang burom na ka Dr. Sukwandaka Wann.
Ya kani ka sngi da lehwarom leh kam ka sngikha wa 266 yong u Dr. Samuel Hehneman uwa man kam uwa sdang yei e dawai Homeopathy ha pyrthai.
U DM&HO, u Dr. K.C Ajar hawa e yei klam ha kani ka sngi da ong u wa i rukom e sumaar Homeopathy man i iwa da rim wei iwa yarap bha ya ki paidbah lada kyruiñ liang wanang hanlada man i sumaar iwa chimpor.
Ka D. Syngai, kam ka kongsan hawa e yei klam da ong ko wa hei yoo yong ka samen toh wa i dawai Homeopathic toh iwa krehkaam bha tangwa emkaam won wow man ki bru kiwa yaichah khnang wow yoh biang yei chait.
Da kyntu ko leh ya ki Doctor wow pteiñ ki ya ki kaam yong ki iwa pynmyntoi ya ki paidbah deiwa kyntu leh yei emkaam wow bood heiyatoh wa i kylla katkam wa yah i por. Da kyrmen ko leh wa neini chaphrang daw ye u sumaar ya ki kjut ya kiwa ki dawai Allopathy ymye ki wow sumaar.
Da kyntu ko leh wow man ki bru kiwa syndong khamtam kam heini i por wa da sdang khai biang ka khlam COVID-19.
Kiwi kiwa da klam ha kani ka sngi toh ka Dr. Bonnie T. Hinge, Dr. Macferoe N Lamare, Dr. Reality Synrem, Dr. Eiphrangdaka Suchian wei ka Dr. Sweety Tariang won da e ko ya ki kyntien khublei.