Ynne ka sngi ka Synjuk ki Waheh Chnong Jowai kam chibynta wow pteiñ ya ki kaam yong ka, da pynman ko ya i pynkhooid ya ka Wah Myntdu wei hachwa wow sdang, da em ka yalang wa tbian.
Ya kani ka yalang da pynlai da u President ka Synjuk u Alan Niangti heiwa u DC ka West Jaiñtia, u Garod LNS Dykes da man u kam u kongsan hei emlang u Dolloi ka Elaka Jowai, u Puramon Kynjing wa ki waheh chnong.
U Garod hawa e yei klam da ong u wa ym emkaam wow pynkhooid ya ka Wah Myntdu du myntu ka sngi donhi tangwa e wa ini u man i kam wow kyrsu thiah wow pynneh wow pynkhooid i ya ka man-ka-sngi wei itæ u sdang i nadooh na pchem na yung.
Hadien ka yalang na Iawmusiang da lai pynkhooid ya tymbud ka Wah Myntdu da ki dorbar chnong katkam ki bynta ka wah wa da ekti ha ki chnong ki dong wow pynkhooid ki.
Hadien i pynkhooid da pynman ya ka yalang ha Syntu Ksiar kawa man leh kam ka pynsñiawthooh paidbah heiwa u Phidel War uwa man kam u Chairman ka Jowai Municipal Board da man u kam u kongsan.
Ya ka yalang da pynlai da u L. Lakiang uwa man kam u Vice President ka Synjuk.
U Phidel War hawa e yei klam da yaroh u ya Synjuk wa da chimkhia ko wow pynman ya kani ka kaam wow pynkhooid ya ka Wah Myntdu.
Da kyntu u leh ya ki paidbah ka Jowai wow man ki kiwa lehkhooid khamtam heiyatoh wa i noh yei jhep wei ym toh wow noh habra.
Da yoh leh i klam wa tbian na ka BDWJHD, wei da pynkut ya ka yalang da ki kyntien khublei na u R RQ Laloo uwa man kam u General Secretary ka Synjuk.