U District Magistrate, East Jaiñtia Hills District da pynkrehkaam u ya ka Section 144 CrPC chirrup wa ka Regulation 3 ka Meghalaya Epidemic Diseases, COVID-19 Regulations, 2020 wei u krehkaam ko nadooh ka 13 tarik uni u bnai ha waroh kawi ka District.
Ya ini da leh hadien wa ku syndet kiwa yoh COVID-19 ha kiwa boon ki jylla wei yow ye u khang yei poor uni u khñiang ha East Jaiñtia Hills District deiwa leh ya ki Test, ki Quarantine wa kiwi kamjooh yow pyntikna wa da bood ki paidbah ya ki kyndon wa da booh ka sorkar.
Kamtæ da khang leh ya ki yalang ki paidbah deiwa emkaam wow jngai iwi na iwi ym duna ya 6 phut, wow sap Mask, wa kiwi kiwi ki kyndon wa da booh wei kamjooh leh da khang wow pynman ya kiwon kiwon ki yalang paidbah wa boon bru (Social, Political, Entertainment, Academic, Cultural & Religious etc).
Ki wym sap mask hawa mih cha lait u chah daiñ kuna ki T. 1000 wei da khang leh u dih kiad, u baam kwai, mynthu wei wow dih duma ha ki thaw paidbah.
Chooh chooh waroh ki dukan u khang ki hapoh 9:00 waje i miet wei ki kaam paidbah toh u pynduna mar chiteiñ i em bru .
Waroh ki Hotel toh u paan ki ya ka COVID Negative Certificate na kiwa wan na baar jylla. I chong kari kamai leh toh u man i du katkam wa da booh namo ma katkam ka Capacity.
