U MP ka Congress na Shillong Parliamentary Constituency, u Vincent H Pala da beiñ u ya ka UDP, deiwa ong wa lada chimti ka UDP ya ka chnat Bordiñ i pyndooh bordiñ namo ka Load Shedding heithaw du 6 kynta u dooh hadooh 12 kynta, heiwa da ong u wa ym mutdur u wa ka UDP u ye ko u leh yei kaam ha ka sorkar kamwa da paw katni.
Da ong u wa ka UDP da pyrchang ko wow sait khooid hakhmat ki paidbah, khamtam wow lait u sarom heiyatoh wa i yaphær hapoh ka Party deiwa pynrap wa ka UDP wot ya ka kaam Pohyung ymye ko wow leh tæ kammon u pait ko ya ka chnat Bordiñ kawa boon ki kynrum kynram.
Ka UDP lyngba u General Secretary dang ini wadep da thoh ko cha u Montri Rangbah ka jylla wow dawa pynhiar chuki noh ya u montri ka chnat Bordiñ, u James PK Sangma.
U Pala da ong u wa heipor wa dawa pyndooh chuki kaam Pohyung ya u James, da ekti ya ka ha u MLA ka UDP, tangwa iyi wa jia? Ki bru waroh ki tip ki khamtam kiwa kreh mooyong neibhah heipor wa ksoh u MLA ka NPP i su ya kawi ka truck kit mooyong man ko T. 50,000, tangwa hadien wa chimkti da u MLA ka UDP, i su ki truck da ku i ar chah.
Da ong u wa heijooh i rukom lada knieh noh ya ka chnat Bordiñ na ka NPP iyi wow jia kamwa man ha ka chnat Kaam Pohyung, deiwa pynrap wa ym em yooluti wow em i kreh bha lada e ha ka UDP.
