Hadien wa sdang ku biang kiwa yoh COVID-19 ha Mizoram, ka sorkar jylla da pynmih kyndon ko wow khang ya ka Aizawl wa ki 10 tylli ki District Headquarter hadooh 7 sngi nadooh ynne ka sngi hadooh ka 26 tarik heiwa ym chah ya ki bru wow mih ki na yung.
Ha ka hukum wa soi da u Chief Secretary ka jylla, u Lalnunmawia Chuaungo, da ong ko wa ini i khang u krehkaam i nadooh 4:00 waje i step ka 20 tarik yow khang yei poor kani ka khlam.
Da chah wow kit ya ki mar cha baar ka jylla tangwa da khang yei lai i wan ki paidbah.
Du ynne ka sngi ha ki 24 kynta wa da lai da em 91 ngut kiwa dang yoh ya u COVID-19 ha Mizoram wei da em 437 ngut kiwa dang chah ktah ha kani ka khlam.
Ka hukum da phah khang ko ya ki Park, ki thaw uiñke, ki baiskoop, Gym, Hall, Restaurant, Yungmane wa kiwi kiwi.
Ki thaw puræ daw man ki kiwa khang wei ka Board Exam wa kiwi kiwi ki Exam daw lai bait ki katkam wa da booh.
Ha Aizawl da pynkrehkaam chwa ini yaka Night Curfew nadooh 8:30 i miet hadooh 4:00 waje i step.
Ha ini i khang katni, ka sorkar ym em pynemkaam ko ya i ktien Lockdown tangwa ki kyndon da sariem ki ya ka Lockdown heiwa hadooh i lai na iwi i chnong cha iwa daw emkaam wow yoh bor chwa.
Ki dukan wa chah u wai toh du kiwa dai ya ki mar wa emkaam, ki mar chna yung, ki Petrol Pump, ki tyndur wa ki karhana chna kari.
Ya ka Airport wa ya u pood ym em khang ya kitu kiwa liwan chapoh ka jylla heiwa kitu kiwa liwan na ki jylla wa boon kiwa chah ktah ha ka khlam daw hap ki wow leh yaka Home Quarantine kawa 7 sngi hanla man Negative ka Report ki.
