15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1
Advertisement ad1

Boon ki kynthai wa dang khian rta wa punkhon ha West Jaiñtia wa kiwa khayi yei doh: Assembly Committee

Advertisement ad1
Advertisement ad1

Ynne ka sngi ki ar ngut ki MLA ka jylla kiwa kynthup ya ka Dr. Ampareen Lyngdoh wa u Himalaya Shangpliang kiwa man ki dkhot ka Committee on Empowerment of Women da wan booddien ki ya ki kaam wow pynkupbor ya ki kynthai hapoh ka West Jaiñtia Hills.

Ya ini i wan booddien da pynman ha Conference Hall ka yung krehkaam ka Soil And Water Conservation, Jowai heiwa ki sahep ki chnat waphær waphær ka West Jaiñtia da wan chimbynta ki hapoh i yahkhmat u DC ka District, u Garod LNS Dykes. 

Ha kani ka yalang da booddien ya ki kaam wa man pyrchah aiñ khamtam wa yatoh wa i chah thombor ki kynthai khynnah wa kiwi kiwi ya iwa da kylli na ka chnat pulit. 

Heijooh i por na kiwi ki chnat da kylli ya i pynkrehkaam ya ki Scheme wa ki Project kiwa da mang kyrpang neibynta ki kynthai wa ki khynnah kam na ka chnat bhalang (Social Welfare), i chait i khiah wa kiwi kiwi. 

Hadien ka yalang, ka Ampareen da pynsñiaw ko yei sñiawkhia hajrong i boon kiwa punkhon dang khian i rta heiwa da em 274 ngut kiwa lai thooh dawai na ki thaw sumaar sorkar wei 144 ngut na ki yong ki bru samen deiwa kyntu ya ki paidbah wa ki seiñbhalang wow krehlang wa ki bor sorkar hajrong ini. 

Da ong ko leh wa ki kynthai wa khayi yei doh i pran, man i i bynta wa sñiawkhia heiwa hapoh West Jaiñtia Hills em kamwa 1,400 ngut ki wei emkaam wow chimkhia ka imlang sahlang heiyatoh wa ini khamtam wow khang yei poor ka kjut HIV/AIDS heiwa hapoh ka District em ki palat 1,499 ngut wei na kini 53 ngut toh kiwa punkhon. 

Chooh chooh da ong ko wa kiwa pynemkaam Drugs hapoh ka District kiwa da Register hapoh ka MACS em ki 500 ngut wei emkaam i yakrehlang ki paidbah wei da phah leh ya ki pulit wow kem ya kiwa dai drugs.

Da phah leh wow pynkrehkaam noh ya ka Maternity and Child Hospital ha Jowai.

Kiwi ki bynta kiwa da klam ha kani ka sngi toh ka Aadhaar heiyatoh wa ka Card Rachon, i embynta 80% ki kynthai ha ki VEC, ka Renovation of Jowai Water Supply Scheme, i pynkrehkaam ya ka Jal Jeevan Mission wa kiwi kiwi.

U Himalaya Shangpliang da ban joor u ya i yakhun pyrchah ya i pynemkaam drugs katkam ka Nasha Mukht Programme deiwa ong wa du ha thaaiñ Jowai em 24 tylli ki thaw kiwa man kam ki Hotspot namo kiwa boon wa pynemkaam ya i Drugs.

Da ong u wa i em ki sarokbah wa ki Dhaba ha tymbud u sarok wanrah ki yei maa ya kiwa chong chnong khamtam wa em ki bru kiwa khayi yei doh i pran iwa ye u pynpoor ya u khñiang HIV/AIDS deiwa pynrap leh wa da phah ya ki pulit wow lai sylli ya kini ki thaw neipor cheipor. 

Hajrong i chem ya i metyap kawi ka bru na Chahtngit ha ki tayaw wa dadep, da ong u wa ki seiñbhalang toh u mih ki chaphrang wow dawa kem noh ya kiwa emkti ha ini i kaam. 

Share this:
Previous

Yoh COVID-19 u Rahul Gandhi

Next

7 sngi u khang ya ka Aizawl wa ki 10 tylli ki District Headquarter neidaw u COVID-19