U Montri Rangbah ka jylla, u Conrad Kongal Sangma da ong u wa ka sorkar da chim ko ya ki laad kammon wow pynlait ya ka jylla nei eh hawa yatoh wa i bordiñ ha kam kini ki por wa ka sorkar jooh chem chitom bha ko wow pynbiang ya i bordiñ.
Da ong u wa lada chem yeiwa hap u pynbait ryntih ya i rukom pynemkaam ya i bordiñ, wei lada waroh chi snem hap wow pynlai da i jooh i rukom krehkaam yow lait na i chah ktah ha ka Load Shedding, iwa mut wa heithaw wow pyndooh bordiñ hadooh 8-9 kynta, ye wow pyndooh ryntih bait 1-2 kynta man-ka-sngi, deiwa pynrap wa wa ka sorkar ym pu chim ko ya i rai tangwa dang hap wow bichaar bniah.
Da ong u wa ka sorkar ye ko wow pynrkhiñ ya i rukom krehkaam ka MeECL neibhah wa em ki ram kiwa ka chnat toh u yoh ko na ki paidbah. Katkam wa pyntip u Montri Rangbah, ki ram wa ka MeECL da yoh ko wow lum na kiwa pynemkaam bordiñ man ko kamwa T. 70 klur.
Ynne ka sngi neiliang u Montri Rangbah da lum u ya ka yalang wa ka chnat Bordiñ kamjooh ka chnat Muna Tyngka wow pynbiang ya iwa emkaam neibynta wow yoh ya ka ram Atmanirbhar Bharat ha ka jylla yei bhah wa ar yow su cha ki Company pynmih bordiñ.
U Conrad da ong u leh wa ha ki kajiak bnai wa da dep da em i ban khia ya ka Meghalaya Energy Corporation Limited (MeECL) wow su lut ya ka ram wa da sah kattu la kamwa 15 snem cha ki Company saam bording heiwa du hapoh 2 bnai da ye u su 50%.
U Conrad da ong u leh wa ka poisa kawa yong katni toh kawa da su thij pa thij wei kawa sah toh ki yong warim.
Da ong u leh wa ka ram wa yoh kawa man ka bhah wa nyngkong na ka Atmanirbhar Bharat, ka sorkar da dep ko wow su lut cha ki Company wa katni wei dang yang sa du ka bhah wa ar yong katai ka ram ka sorkar pyrdi, kawa ka sorkar jylla dang pynbiang ko ya iwa emkaam yow phah noh cha ka sorkar India, heiwa da pynsñiaw u leh yei kyrmen wow yoh noh rap smat ya kani ka ram.
