U Montri Rangbah ka jylla, u Conrad Kongal Sangma ynne ka sngi da kyntu joor u ya ki paidbah ka jylla wow yada ki pyn daki yaki hi na ka khlam COVID-19, deiwa ong wa ka la-ær wa ar namo ka Second Wave ka khlam toh kawa khlan wei poor smat bha ko.
Da ong u leh wa hadooh katni ha Meghalaya da dep e dawai yada namo i tika cha ki palat 1.80 lak ngut wei ym em kiwa chah ktah na ini i e tika lait noh i sñiawpher wa malu mala ha ki kattu katni ngut.
U Conrad da ong u wa katkam wa chem da pynyoo che wa i dawai yada COVID-19 da yarap bha i ya ki paidbah wei da em 75 Million ngut ki bru ha ka pyrthai kiwa chim ya ini i dawai tika, wei da em hapoh 100 ngut kiwa da dep yoh tika kiwa chah ktah ha u khñiang COVID-19. Deiwa pynrap wa kiwa yoh ya ini i dawai hap hi ki wow yada ya idæ.
U Montri Rangbah da ong u wa i thong ka sorkar hi katni toh wow e tika ya waroh kiwa chong chnong wei iwa kongsan tam dooh toh ya ki bru kiwa yachem paidbah bha wa ki wakreh wa em hakhmat dooh wow yaleh pyrchah.
