Ka Hynniewtrep Youth Council (HYC) Narpuh Circle da yarap ko deiwa chna ya iwi i yung yong ka Rida Shadap Manar kawa chem chitom kawa sah ha chnong Nongsning, East Jaiñtia Hills District.
Ya ini i yung da yarap chna khnang wow lait na ka sngi u slap katwa joh i bor ka seiñ nadooh ki dkhot yong ka wa kiwa kitkaam yong ka kiwa da pynlut por kamwa ar sngi wow chna ya ini i yung.
Ka seiñ da sñiawngooh ko leh ya u Blai uwa da wailaad ya ka seiñ wow ye ko u yarap ya kani ka manyung.
Ha ka 24 tarik uni u bnai da wai ya ini i yung wow sah ka Rida heiwa da em ka yalang wa tbian heiwa u Michal Chyrmang uwa man u Vice President ka chnat East Jaiñtia Circle yong ka seiñ da man u kam u kongsan wei ya ka yalang da pynlai da u Publicity Secretary u Pyndap Syiemlieh.
Ha kani ka sngi da yoh ya ki kyntien ngooh Blai na u President, u Keldrim Sumer wa ki kyntien khublei na u General Secretary u Albinus Lyngdoh kamjooh i klam wa tbian na ka Rida.
Neiliang u Michal Chyrmang da yaroh u ya ki dkhot ka seiñ kiwa da chim ya kani ka lyngkor wow chna ya ini i yung deiwa kyntu leh ya kiwi ki khynnah wow wan ki chaphrang wow kreh neibynta ka jaitbru.
Neiliang ka tre yung, ka Rida da e khublei ko ya ka seiñ deiwa kular leh wow kyrchaan ya ka seiñ ha ki kaam wa bha yong ka.
