Ha kini ki tayaw wa dadep neiliang ki bor District ka East Khasi Hills da booh kyndon wow khang ki yaw ki haat wa kiwi kiwi kam chibynta wow khang yei poor ka khlam COVID-19.
Kamtæ ynne hawa yaklam wa u DC ka West Jaiñtia Hills, u Garod LSN Dykes da ong u wa hadooh ynne ka sngi ympu em u chim ya kawon kawon ka rai wow khang ya ki yaw hapoh ka District.
Da kyntu u leh ya ki Market Committee wow bood ryntih ki ya ki kyndon wa ki SOP wow yakhun ya kani ka khlam.
Chooh chooh da ong u wa lada duna kiwa chah ktah ym myntoi wow khang ya ki tangwa u pynkrehkaam du da ki Containment wa kiwi kiwi neibhah hap pait leh yei khih i kreh wei kamai imja (Livelihood) ki bru.
Da ong u leh wa lada ki Committee ymye ki wow pynkrehkaam ya ki kyndon wei lada ki bru ymye ki wow bood ya ki kyndon neiliang ki bor District daw leh ki yeiwa emkaam neibynta i chngaaiñ kiwa boon wa lang.
U Deputy Commissioner da pyntip u leh wa kam chibynta wow khang yei poor ka khlam COVID-19, ha ki thaw psiah chapoh ka jylla na ka District, kam na Dima Hasao wa West Karbi Anglong emkaam wow bood ki ya ki kyndon ka sorkar jylla wa da pynmih ynnin (wow chong kset hapoh yung 7 sngi).
Kawi won toh heiyatoh wa ki yung wa em wa khlaad wa yap, heiwa da ong u wa daw chah du 50 ngut ki bru. Da kyntu leh ya ki yung wow booh ya ki Register yow thoh ya ki bru kiwa wan.
