U Montri wa pait ya ka chnat Excise ka jylla, u Kyrmen Shylla da ong u wa ka dan wa yoh da ka chnat lyngba ki dukan kiad IMFL daw yarap ko chiboon ya ka jylla, heiwa da ong leh wa kamwa man katni ka jylla duna bha ko ki laad pynmih poisa.
Kam wow kdaw heini, ka sorkar kam chibynta wow pynkhor ya ki kyndon wow khang yei poor ka khlam COVID-19, da pynbna ko wow khang ya ki kattu katni ki dukan dai tiar nadooh kani ka tayaw deiwa pynlait ya ki dukan dai kiad.
U Kyrmen da ong u leh wa hanla ka jylla chem chitom ko, tangwa yaleh ko wow pynlai bait ya ki kaam, deiwa pynrap wa lada khang lut ya waroh daw chem chitom ka jylla wow pynmih dan wei ini daw wanrah i yei eh i khoo.
Da ong u wa lada ka jylla chem chitom ko, ka dan wa da yoh na ka chnat Excise daw ye ko u yarap smat ya ki thaw wa chah ktah, deiwa ong wa ka jylla da chah ktah bha ko ha i khangsbak (Lockdown) yong u snem wa dadep wei ka sorkar emkaam wow pynlaibait ko ya ki kaam.
Katkam wa ong u Montri, kani ka chnat toh kawi na ki chnat kawa ye u pynmih poisa ya ka jylla, deiwa ong wa ha ka chi snem ka chnat yoh ko palat T. 200 klur na ka dan.
