E yarap u MDC ka Saphai da ki 3 tylli ki Ambulance

U MDC ka 13 Saphai Constituency u Habahun Dkhar haka 5 tarik uni u bnai da ekti u 3 tylli ki kari kit bru wa kjut wa chitom namo ki Ambulance cha ki paidbah ka Constituency.

Ya kini ki Ambulance da ekti kawi cha kiwa yahkhmat chnong ka Psiar, Khatkasla wa Mooluber sa kawi won neibynta ka Iooksi Pyllun kawa kynthup ya ka Iooksi Iapkhla, Iooksi Kyanmynsar, Iooksi Tongkiad, Umdeiñlien wa Priang, katwa kawi won neibynta kiwa chong chnong ka Saphai wa Iawthymme.

Ha Psiar da ya emlang u Waheh Chnong ka chnong Psiar u Mynta Synnah wa kiwa yahkhmat chnong ka Khatkasla wa Mooluber deilang wa ki paaid ka thaaiñ.

Ha Iooksi won da emlang kiwa yahkhmat ki chnong waphær waphær kiwa em hapoh ka Iooksi 5 Waheh.

Related posts

Pynbna ka NPP ya ka thup wa le ki kyrtong MDC cha ka JHADC

January 15, 2025

Lada ka District Council wiar ko, ka jaitbru leh daw wiar ko: Rikut Parein

January 14, 2025

Katwa ha Saphai da emlang u Waheh Chnong ka chnong Saphai u Anthony Bareh, ki dkhot chnong na Saphai, Iawthymme wa kiwi kiwi won.

U Habahun Dkhar hawa e yei klam da ong u wa kini ki kari kit bru wa kjut ym toh wow pynemkaam yow leh ya ki kaam sñiawbha næ ha i por lehkmen, wei kini ka kari toh u e chakri thij hawa kjut wa chitom wei jynjar. Na ini i daw u MDC da kyrpaad u ya kiwa pynlai ya kini ka kari wow kitkhia wow pynlai bait lai ryntih ya kitai ki kari neibynta i myntoi ki paidbah wa chong chnong.

Da ong u leh wa kini ki kari ym mut du ya kiwa dooh wa duk næ ya kiwa mahajon wei ym em mut du ya kitu kiwa kyrchaan næ ki wym em kyrchaan ya oo tangwa ya waroh kiwa kjut wa chitom wa emkaam wei u krehkaam lang ya waroh salonsar khlem da leh chilliang.

Kiwa yahkhmat chnong waroh hawa e yei klam da pynsñiaw ki yei sñiawngooh ya u MDC yong ki uwa da smat wow pynyoh da kitai ki kari Ambulance cha ki paidbah chong chnong ka thaaiñ.

U Waheh Chnong ka Umdieñlien hawa e yei klam da ong u wa kani ka kari u e yarap sakhiat ko ya ki paidbah chong chnong neibhah boon ki paidbah ka thaaiñ man ki kiwa dooh wei ym joh bor ki wow pynemkaam da ki kari kamai hawa em i kjut i chitom.

Da yaroh u leh ya u MDC hajrong i yaleh chitom yong oo wow pynyoh ya kitai ki kari Ambulance, “Man u u bru uwa duna i ktien, tangwa uwa pynyoo da ki kaam bah boonsien,” da ong chooh chooh u Nangaibormi Sutnga.

Ya kini ki kari Ambulance u MDC da pynyoh lyngba ka Scheme Special Assistant Grant (SAG) yong u snem 2019-20.