U Montri ka chnat Bordiñ ka jylla u James PK Sangma da ong u ynne ka sngi wa ki karkhana saam bordiñ kam ka NEEPCO wa ka NTPC tieñsar ki ya boi ka sorkar jylla ym su ko ya ka ram yong ki hadien wa da yoh ya ka poisa yarap na ka Atmanirbhar Bharat Abhiyan.
Kam wow kdaw heini ka sorkar pyrdi da phah ko ya ka Reserve Bank of India wow khate ya ka bhah ka sorkar jylla hadooh T. 370 klur neibynta wow su ya ka ram wa sah ha ka NEEPCO.
Hajrong ini neiliang u James da ong u wa i slem wow yoh ya ka poisa toh neidaw wa emkaam wow pynbiang yeiwa emkaam wei ini da wanrah i yei tieñsar kini ki karkhana (Company), da pynrap u leh wa neiliang ka sorkar da chimkhia ko wow su pyndep noh ya waroh ka ram.
Da ong u leh wa neini i tieñsar, neiliang ki karkhana da wanrah biang ki da ka soskular wa da soi da ka sorkar pyrdi, ka sorkar jylla wa ka DISCOM iwa pynyoo wa lada ym su ka sorkar jylla, ki karkhana u lai bait ki cha ka RBI wow phah khate ya ka poisa kawa man ka bhah ka jylla.
Neiliang u Montri, ynne ka sngi da ong u leh wa ini i phah ka sorkar pyrdi toh du neidaw wa slem wow su ya ka poisa wei kani ka hukum da pynyinsur chooh chooh ko sa kattu katni sngi wei ka sorkar jylla dang yaklam ko leh wow pynyoh smat ya ka ram na ka bhah wa ar yong ka ram Atmanirbhar.
Heijooh i por da pyntip u wa ka sorkar jylla da rai ko wow pyndam noh ya ka Power Purchase Agreement (PPA) wa ka National Thermal Power Corporation neidaw wa man chiliang ko wei wa toh hajrong ini ka yung Kasari leh da phah pynsangeh ko yei thmu wow pyndooh bordiñ næ pynkrehkaam biang ya ka Load Shedding da ka NTPC.
Heijooh i por da ong u wa i thmu ka sorkar hi ymtoh u kut du wow pynsangeh ya ka PPA, tangwa iwa emkaam dooh toh wow pynkhlan ya i pynmih bordiñ na ka jylla wow pyndap yeiwa emkaam ko, deiwa pynrap leh wa ka sorkar sñiawkhia ko hajrong i tieñ ki paidbah wa i chah ktah yong ki lada wanrah ya ki Project pynmih bordiñ neibhah wa ki tieñ ki ya chah ktah ka rymaw wa i kamai kajih yong ki deiwa ong wa ka sorkar daw pynbait ko ya iwon iwon i eh chwa wow lai chaphrang ya ki kaam.
U James da ong u leh wa katkam i thooh bniah ka Ministry of New and Renewable Energy, ka jylla Meghalaya ye ko wow pynmih bordiñ hadooh 3300 MW du nei bor ka um, tangwa hanla ka jylla em ko kani ka laad, hadooh katni ympu kynjoh wot tang 10% wa da ye u pynkrehkaam neibhah wa da em chiboon i kdoh soskular ha ki por wa nachwa iwa pynman ya ka sorkar wow chong suki donhi ki, wei da pyrchang wow pynkreh won ya ki Project wa da dep soi soskular (MoU) wa da yasoi rap nachwa.
