U MLA ka Congress na Mawlai, u Process T Sawkmie da pynsñiaw u yei sñiawkhia neidaw wa em boon ngut ki bru kiwa khlaad noh nei chah ktah ha u khñiang COVID-19, heiwa da ong u wa ka chnat i chait i khiah ha ka jylla da toh wow pait bniah bha hawa yatoh wa i sumaar ya kitu kiwa em chwa i chitom ha i por wa lai chah sumaar ki ha ki Hospital.
Da ong u wa ye u man wa i daw yong iwa boon kiwa khlaad na kiwa chah ktah ha u COVID-19, ye wow man wa toh kiwa chitom toh kiwa lai chah sumaar ya kiwi de ki kjut wa da em chwa ki, hadien wa poi ha ki Hospital lada chem wa yoh COVID-19, toh u sumaar chwa ya iwa da chitom ki wei kamwa man da sumaar noh yei kjut COVID-19. Da kyntu u ya ki stat i chait i khiah wow bichaar bniah bha hajrong ini wa ye u man na kiwi ki daw wa ku kiwa khlaad ha ka jylla.
Hawa kylli, da ong u wa i ku yong kiwa yabi u khñiang COVID-19, neiliang ka sorkar da pyrchang kow wow leh ya iwa bha tam tam wow yada, wei da kyntait u wa i wym ye u kdoh u khoom ka sorkar, tangwa da ong u wa ka sorkar ka emkaam ko wow leh rap bha chooh chooh.
Ha iwi i liang u MLA ka Mawlai da ong u wa man ko iwa emkaam wa sorkar u khut ko ya ka yalang yong waroh ki seiñ saiñpyrthai wow ya syllok kammon wow wanrah ya ki laad wow pynduna ya i poor smat kiwa yabi ya u khñiang COVID-19 ha ka jylla.
