U MLA warim ka Nongkrem, u Ardent Miller Basaiawmoit da ong wa i rai yong ka MeECL wow e ya ka chithi mynjur neibynta i pynlai ya ki 56 tylli ki Sub Station kiwa haap hapoh i pait yong ka Meghalaya Power Distribution Corporation Limited cha ka Broadcasting Engineering Consultants India Limited (BECIL) Noida, wot hadien i pyrchah wa joor na kiwa boon ki liang, ini pynyoo che ko wa ka MeECL ym em ko i kheiñkor wei burom ya kitu waroh kiwa em ya i sñiawkhia ya i long i man yong ka.
Da ong wa i long i man wa i krehkaam yong ka MeECL ha kani ka kynti wa em hapyrdi chiboon ki chah pynbaad wa i bichaar ya kiyi kiyi ki wym che wa ki wym khooid, da poi chadooh u pood wow dawa yei takit kawa laitlooid ka wym yachah chilliang.
Da ong u wa i wym ye wow chemphang ya ka yurim wa ya ka luti lai wa ka MeECL da lai ko katni chakhmat wow e chithi i mynjur hawa kam ini i por, khamtam hawa ka sorkar da thung ko da ka takit wa laitlooid ka wow khlieh da uwa bichaar uwa da chong-ngiah na i kaam, deiwa pynrap leh wa ki phang kylli kiwa mih katni toh ya waroh ki seiñ saiñpyrthai kiwa em ha kani ka sorkar, khamtam dooh ya ki seiñ ri-loom kiwa kam wa yieñ ki neibynta u tre chnong tre thaw, kamtæ ini i ekti wow pynlai ya kini ki Sub Station cha ka Company kawa na baar daw pynmyntoi ko næ ym em ya ki tre chnong tre thaw wei kamjooh leh ya ki paidbah kiwa pynemkaam bordiñ.
U Ardent da pynsñiaw u wa ka sorkar toh u pynsangeh chwa chipor wow pynkrehkaam ya kitu ki rai yong ka MeECL kiwa da rai ha kini ki kajiak sngi kajiak bnai wei hadooh wa da dep chwa ya ka takit, wei da kyntu kyntu joor u ya ka sorkar jylla wow pynsangeh syndon wow soi ya kiwon kiwon ki kdoh kular hapyrdi ka ka MeECL wa kiwon kiwon ki seiñ næ ki Company katwa ka takit dang lai ko wei kamjooh leh wow pyndam noh ya ka chithi wa da e kam i mynjur wow e wai ya ki 56 tylli ki Sub Station.
