Hadien wa ptieñ i boon kiwa chah ktah ha ka khlam COVID-19 hapoh ka District wei wow yada nei poor ko, neiliang u District Magistrate, West Jaiñtia Hills ynne ka 13 tarik da pynmih u ya ka hukum wow pynkrehkaam da ka Weekend Lockdown ha waroh kawi ka District nadooh i step 5:00 waje kani ka 15 tarik hadooh i step 5:00 waje ka 17 tarik uni u bnai (May).
Ha kani ka Lockdown da khang yei lai i wan hapyrdi ki jylla namo ka Inter-State Movement tangwa ym krehkaam ko ya ki kari wa lai luti lyngba ka District kam kiwa na Assam, Tripura, Manipur wa Mizoram heiwa ym chah ya ki wow pynyieñ kari ki ha ki thaw wa man chnong ha tymbud u sarokbah NH-06 (NH-44 warim) uwa hapoh ka West Jaiñtia Hills District.
Kani ka hukam ym krehkaam ko ya kiwa kreh hei chait hei khiah wa kynthup ya kitu kiwa leh tika COVID-19.
Da pynlait leh ya ki wakreh Essential Services kam ka Food Cooperation of India, Electricity, Water Supply, Security, Municipal Services, Fire & Emergency Services, National Informatics Centre wa Telecom Communication Services.
Da pynlait leh ya ki kari wa kit mar, ki wakreh ha ki laad pathai khubor, ki kaam rep, ki kaam MGNREGA ha thaaiñ palatsor.
Da pynlait leh ya ki bru wakreh COVID-19 Duty, ki Pharmacy, kiwa pynpoi ya ki LPG wa ki Petrol Pump.
Ki Pass kiwa da e nachwa ym chah de wow pynemkaam, da pyndam ya ki hapoh kani ka hukum.
Ya kiwa leh pyrchah daw chah daiñ kuna ki hapoh ka Section 51(b) ka Disaster Management Act, 2005.
