Ka District Magistrate ka East Khasi Hills da pynmih hukum ko ha ka 22 tarik uni u bnai yow pynbna ya ka Nongthymmai, Diengling wa Lumkhir kiwa em hapoh ka chnong Mawber wa Mawryngkneng C&RD Block wow man ki kam ka Containment Zone.
Ya kani ka hukum da pynmih hadien wa u Incident Commander uwa man leh kam u BDO ka Mawryngkneng C&RD Block wa u Medical & Health Officer In-charge ka Jongkhsa PHC da pyntip ki wa em 17 ngut ki High Risk Primary Contact namo kiwa yachem wa kiwa yoh COVID-19 kiwa sah ha Nongthymmai , Dienglieng wa Lumkir kiwa haap hapoh ka chnong Mawber kiwa em hapoh ka Mawryngkneng C&RD Block kiwa ym bien wow leh ya ka Test ya u COVID-19 wei da chem toh kiwa uiñ chawah chaneiñ hapoh ka chnong khlem da chong khop hapoh yung kawmwa da phah ka sorkar.
Kamtæ na i daw wym yoh u Test ya kini ki 17 ngut yow tip tikna lada toh kiwa rah ya uni u khñiang iwa ye u pynpoor ya ka khlam iwa daw booh hei ma ya kiwi ki bru, wei yow ye u khanglaad yei lai i mih ki wym bien u chah Test da pynman noh da ka Containment Zone yow khang yei lai wa i mih ki bru deiwa phah ya waroh wow neh ki khop hapoh yung.
Ini leh daw e laad ko ya u Medical Officer In-charge wow booddien yei long i man ki wym bien u chah Test lada sdang ki wow yoh ya ki dak ki chin wa yoh ya uni u khñiang.
Hapoh ka Containment Zone da khang wow mih cha lait na ki yung, waroh ki dukan wa ki yung krehkaam u man ki kiwa khang wei da khang leh wow pynman ya ki yalang paidbah.
