Ki wakreh ka GHADC kiwa em hapoh ka lama ka NGEA da beiñ wei da kyntait ki yei kam u Benedict Marak, CEM ka GHADC ha ka chithi wa da thoh u ha ka 22 tarik uni u bnai cha u Deputy Commissioner West Garo Hills Tura yow booh bru yada namo ki Security Personal ha ka yung krehkaam ka GHADC yow yada na iwon iwon i jia wym poi pyrkhat yow ye ki wakreh ka GHADC wow krehkaam deiwa bait wa ryntih.
Ka NGEA da ong ko wa ha ka chithi wa da e cha u Deputy Commissioner, u Benedict Marak da kam u wa ki wakreh ka GHADC da mynjur ki wow pteiñ biang u kreh hadien wa da dep ki wow yaklam ya pynbait wa ki dkhot ka Executive Committee, GHADC heiwa u su ya ka tulop 5 bnai ha i bai tulop warim namo ka Old Scale, wei u sdang kreh noh ki nadooh ka 24 tarik uni u bnai.
Neiliang ka NEGA da jubab ki ya ini i kam u Benedict Marak wa ki kam ki wakreh ym em myjur ki wow pdiang ya ka tulop 5 bnai hei su da ka tulop warim wei u sdang biang ki wow kreh, kamtæ da dawa na u Benedict Marak wow paan maap ya ini iwa khana thok u ya ki paidbah kamjooh leh ya u khlieh ka District.
Chooh chooh da ong leh wa lada em kam itæ i mynjur wow pdiang ya ka tulop wei wow sdang kreh biang, cheiwon em ka chithi wa da ya mynjur ya ini.
Da kdaw leh wa ha ka 20 tarik uni u bnai heiwa ka NGEA da e FIR ko pyrchah ya ki arngut kitæ u Sukumar N. Marak Superintending Engineer Civil Work wa u Niksang G. Momin Executive Engineer, Civil Works ka Garo Hills Autonomous District Council Tura, u CEM ka GHADC em hi u hapoh ka yung krehkaam u wei da yang ya oo hadooh i step deiwa yooluti wa daw mih u wow yaklam tangwa da mih u khlem bien u wow yaklam.
Kamtæ da dawa wa u Benedict Marak kamjooh ya u montri rangbah ka jylla u Conrad K. Sangma toh u ieh noh ki yei kaam kam u CEM wa CM lada ym ye ki wow pynyoh ya ka tulop wa sah la 34 bnai. Da ong ki leh wa emkaam T. 48 hadooh T. 50 klur chi snem yow su ya ka tulop iwa man leh iwa dap wow su ha ka bai tulop wa thymme deiwa ong wa ym leh kiwa yahkhmat yeini neidaw wym em ki yei mon wow pynbait yei kynrum kynram hapoh ka GHADC.