Ka Meghalaya People United Front (MPUF-EJHD) ryngkat wa ka San Chnong Circle ynne ka sngi hapoh i yahkhmat u President, u Kyrshan Blah wa u Juny Phawa uwa man u President ka San Chnong Circle, ynne da lai pait ki ya ka COVID-19 Screening Center ha Ratacherra, East Jaiñtia Hills District.
Ha ini i lai, ka seiñ da chem ko chiboon i eh i khoo ha kani ka thaw khamtam kiwa kreh kiwa da ood yei wym em ki thaw wow sah wow sum iwa biang.
Da khana ki leh wa em ki por chah kynroi ki ha kiwa yah kari khamtam hei miet khlem daw du wow lait u leh ya ki Test ha kani ka thaw, da ong ki leh wa ha kini ki kajiak bnai uwi u wakreh da chah tyrrah u ha kawi ka truck neidaw wa ki pulit leh em ki du ar ngut donhi wei ym man ya ki iwa chngaaiñ khamtam hei miet khamtam ki kari heh kam ki truck heipor wa doom yah pynhær bha ki ya ka kari khlem kheiñ de manda poi ha ini i thaw.
U Kyrshan Blah da pynsñiaw u yei diaw wei sñiawkhia deiwa dawa na ka sorkar khamtam na u Deputy Commissioner ka District wow booh noh da ki pulit wa em tiar yaleh kamwa 4-5 ngut ha kani ka thaw khnang wow man iwa chngaaiñ ya kiwa kreh.
Ka seiñ da ong ko leh wa lada ki bor District ym chimkhia ki yeini daw thoh noh ko cha u montri ka chnat i chait i khiah ka jylla wow leh yeiwa emkaam.
