Ka sorkar jylla ynne ka sngi da pyntip ko wa kitu kiwa em pyrtuid hapoh ka MHIS lada chah ktah ki ha u COVID-19 wei da chah sumaar ki hapoh ki Hospital, daw pynku yei yarap wa yoh ki iwa T. 4,900 chi sngi u e yarap sa T. 60,000 kam ka Add On Package.
Hawa pyntip ya ini, u symbood montri rangbah ka jylla u Prestone Tynsong da ong u wa kamwa man kattæ ya kitu kiwa chitom wa hap booh hapoh ki ICU, lyngba ka MHIS da yoh yarap ki T. 4,900 chi sngi iwa kattu u e sa T. 60,000 ya kitu kiwa chitom na kiwa boon ki jait ki chitom wa mih neiwa yoh COVID-19.
Ya ini i rai da chim da ka sorkar ha ka Review Meeting wa khlieh da u Montri Rangbah ka jylla u Conrad Sangma hadien wa ka chnat i chait i khiah da wanrah ko ya ka yukheiñ hajrong ini.
U Prestone da ong u leh wa hapoh ka jylla i thap pyrtuid hapoh ka MHIS dang pteiñ i hadooh katni wei kiwa da thap pyrtuid da em ki du 58.5%.
Da ong u leh wa ym tip yei daw wym wan ki bru ka jylla wow thap pyrtuid hapoh kani ka Scheme deiwa kyntu leh ya ki paidbah wow chim kabu ya kani ka Scheme.
