Heiyatoh wa i jia wa chyrkhei ya kawi ka kynthai heiwa i Video yong ini wa jia yaka wa chah tba kti, chah thombor, chah leh khlem akor ko ha ki 5 ngut ki bru hapoh iwi i yung da poor i kylleiñ kylleiñ, pyn ynne ka sngi ki pulit da yoh ki wow kem ya ki soo ngut ki bru kiwa da mih dur hapoh ini i Video.
Ya ini i jia da chemdien da ki pulit ka Bengaluru City heiwa ya ka Case pyrchah ya kiwa chah kem da leh da ka Ramamurthy Nagar Police Station.
Ini wa jia ya kani ka kynthai toh iwa da jia ha iwi i yung wa em ha Ramamurthy Nagar heiwa hadien wa em wa pyntip cha ki pulit, da lai kem ki ya kini ki soo ngut na Avalahalli heiwa ya kiwa emkti da tip pyrtuid kam u Sagar, Mohammed Baba Sheikh, u Ridoy Babo wa u Hakeel katwa ka kynthai wa emkti lang ym pu em chem ya ka.
U heh pulit da pyntip u wa kini ki bru toh kiwa na Bangladesh wei da sah ki ha iwi i yungwai deiwa pyrchah ya ka aiñ la kattu katni snem. Chooh chooh da ong wa kini ki bru toh kiwa emkti hei wow khayi kynthai heiwa kani ka kynthai toh kawa da pyrchang wow yut waka poisa heiwa kini ki bru da ye ki wow chem biang ka wei da leh ki ya ka kamwa leh ki neidaw wym pynuiñ ko ya ka poisa.
Da pyntip leh wa kini ka kynthai katni da em ko cha kawi won ka jylla wei ki pulit dang pyrchang ki wow thooh ka wei ki pulit da ngait ki wa waroh kini kiwa emkti toh kiwa wanrah ya kani ka kynthai na Bangladesh yow pynemkaam ya ka deiwa khayi yei doh ko.
Ini i jia ya kani ka kynthai da antaad toh iwa da jia chi tayaw chwa heiwa nyngkong ya ini i Video da poor i ha Assam wa ha West Bengal heiwa ki pulit ka Assam leh da yaleh ki wow booddien ya ini i kaam heiwa ki pulit ka Kolkata won da pyntip ki cha ki pulit ka Bengaluru.
Neiliang ki pulit da pynngat ki ya kiwa chah kem ha ki kyndon wa salitbor wei ka takit dang lai ko chakhmat.
