U YouTuber uwa na Punjab uwa tip kam u Paras Singh, uwa da sah naam katni kam uwa khut ya u MLA ka Congress u Ninong Ering u wym toh u nong India wei ka jylla Arunachal Pradesh toh kawa em ha China heiwa ya ini dong u ha iwi i YouTube Video yong oo iwa da wanrah yei beiñ na kiwa boon hadooh wa da kem ya oo wei da rah ya oo cha Itanagar, Arunachal Pradesh.
Ya u Paras Singh da kem da ki pulit ka Ludhiana heiwa da kit ya oo da ka lieñsuiñ cha Itanagar ha ka 27 tarik wei da chimkti ya oo da ka Special Investigation Team ka Arunachal Police hei miet ka jooh ka sngi.
U Chief Judicial Magistrate (CJM) ka yung bichaar ha Yupia ha ka sngi thohdieñ da phah u ya ki pulit wow kshoh ya u Paras chisngi. Ynnin won da phah kset (Judicial Custody) 6 sngi ya oo. Ya u Paras u booh ha District Jail wa em ha Jully hajan Itanagar neibynta ini i por.
Ya u Paras hadien wa kem ya oo da pynyoo ya oo ya i parom ka jylla Arunachal, ki loom ki wah yong ka, ki jaitbru yong ka, ka dustur riti yong ki, ki sur ki rwai yong ki wa ki jait baam yong ki.
Da pynyoo leh ya u Paras ya u pood ka India wa ka China uwa jrong 3,488 Km uwa lai lyngba ka Arunachal Pradesh, Sikkim, Uttarakhand, Himachal Pradesh wa Ladakh.
U Paras Singh da ong u ya iwa ong u ha ka YouTube Video yong oo hadien wa u MLA ka Congress na Arunachal da thoh u cha u Prime Minister Narendra Modi, yow kyrpaad ya oo wym toh u chah biang wow wan ka PUBG Mobile ha India kawa da e pyrtuid thymme Battlegrounds Mobile India.
U Paras Singh da ong u wa da pynmih u yei Video yong oo yow tip ki bru chapang ini wei kamjooh yow yoh boon kiwa pait yei Video yong oo yow yoh poisa u chiboon wei wa chrai u leh yeini i pyrchah u MLA ya ka PUBG neibhah kam u YouTuber yoh poisa na ki Video yaleh ke (Games) ha ka Internet iwa pynyoo u ha ka YouTube Channel yong oo.
