Ki pulit ka Assam da kam ki wa em 6 ngut kiwa khih mylla tih mooyong na ka jylla Assam kiwa da sahkut ha iwi i krem mooyoong ha Sutnga, Umpleng East Jaintia Hills District.
Heiyatoh wa ini hawa yaklam wa u montri ki kaam pohyung ka jylla, u Lahkmen Rymbui da ong u wa neiliang ki pulit da kem ki ya u tre kani ka paar moo ya uwa tip kam u K. Chyrmang, tangwa ympu yoh ki u takit ya oo neidaw wa chah ktah u ha u COVID-19 wei katni em u hapoh ka Corona Care Center, katwa ya u Sordar wa pait ya i kreh uwa man u baar jylla dang yut u na ki pulit.
Da pyntip u wa neiliang u SP ka Silchar da pyntip u cha ki pulit ka EJH wa em kiwa khih mylla sngi na Assam kiwa da chah kset hapoh ka krem mooyong wei mar tip yeini neiliang ki pulit ka East Jaiñtia Hills da lai takit ki yeini wut-wut tangwa nei pynthut u slap, wei da pteiñ biang ki wow thooh ya kani ka krem heiwa da chem ya kawi ka krem kawa da ieh chrah khlem kiwa kreh, ya kawa da suba wa ye u toh kani ka thaw wa da thmu wow tih mooyong.
U Lahkmen da ong u wa kiwa mylla boi da lai pynkhooid ki ya kani ka thaw wow sdang biang yei tih moo, tangwa kamwa man hadooh katni ympu ye u tip yeiwa sakhiat.
Chooh chooh da ong u wa ki pulit katni da leh ki yeiwa emkaam khnang wow chem yeiwa sakhiat wei yeini daw tip che hadien wa yoh kem ya u Sordar.
