Ka MLA ka Congress na East Shillong ka Dr. M Ampareen Lyngdoh da thoh ko cha u Speaker ka Meghalaya Legislative Assembly wow pyndam noh ya u Thomas A. Sangma, MLA wow man kam u dkhot ki House Committee.
Ka Ampareen da ong ko wa neidaw chah pynbaad u MLA ka North Tura ha kawi ka bru wa slaitbor u ka wei manda em i jia wa kamni pyrchah ya u dkhot ka yung dorbar chna aiñ, da pynkhyrngiat ko ya ka imlang sahlang kamjooh ya kiwa mihkhmat paidbah wa hap ki wow pyntikna wa i kitkhlieh toh u em i.
Chooh chooh da ong ko wa i rukom krehkaam ka aiñ toh iwa pait chilliang pyrchah ya ka kynthai wei kawon kawon kawa chah slaitbor toh u e laad ya ka hawa wan ko chakhmat deiwa kam wa em wa thombor ka.
Kamtæ da ong ko wa ha ka yurim wow em i kitkhlieh wei yow man leh iwa khooid, toh u pyndam noh ya u MLA kam u Chairman ka Assembly Committee on Estimates wa kam u dkhot ka Committee on Public Accounts hadooh wa ye ki pulit wow pyndep ya ka takit lane hadooh wa bichaar ka yung bichaar.
Da ong ko leh wa i pyndam ya ki MLA kam ki dkhot ki Committee toh iwa da dep leh heiyatoh wa u Julius Dorphang uwa da chah pyndam na ki Committee ha u 2017 da u Speaker warim u A.T. Mondal hadien wa em ka FIR pyrchah ya oo wa slaitbor u.
