Ha ka kyrwoh wa phah da ka Meghalaya Human Rights Commission (MHRC), da pyntip wa da paan ya ka bui (Report) wa bniah na ka sorkar Meghalaya heiyatoh wa i yap kawi ka Nurse kawa kreh ha Ganesh Das Hospital wa i jia ha iwi i krem tih mooyong ha Umpleng, East Jaiñtia Hills.
Ka MHRC da ong ko wa da chimkhia ko ya ka ujor ka State President ka Meghalaya Pradesh Mahila Congress hajrong i khlaad ka Manisha Turnia kawa punkhon la 24 tayaw deiwa pynbaad wa i wym em i kitkhlieh wei leh chongchit kiwa pynlai ya ka Hospital ki wym bien u phah dam chwa u kreh ko, dapoi chadooh i yap ko.
Ka Commission da Register ko leh da ka mukotduma hajrong i ujor u Yeahyea Hussain uwa sah jan yung uwa tih mooyong uwa da sahkut ha iwa jia ha Umpleng. Katkam ka ujor, da ong wa kiwa hayung hasem yong kiwa tih mooyong kiwa chah kset ym chah ya ki wow lai ki cha ini i thaw wa jia.
Hajrong kini ki ar tylli ki kaam, ka Commission da phah Notice ko cha u Secretary ka sorkar Meghalaya yow phah ya ka Report wa bniah cha ka Commission hapoh 10 sngi.
Ka Commission da pynknymoo ko ya ka jylla wa katkam ka Article 21 ka Constitution da ong ko uwon uwon ym ye u pyndooh yei hok wow im wei wow man laitlooid ki lait noh manda khang da ka aiñ.
