U Montri Rangbah ka jylla, u Conrad K Sangma da ong u wa em i yoh nong wei dooh nong lada ekti wow pynlai ya ki kattu katni ki Circle ka MeECL cha ka REC, deiwa ong wa lada ka sorkar rai ko wow kitkhlieh wow su lut ya ka ram yong ka MeECL ym ekti de ko wow pynlai ya ka cha ki Company, wei i doohnong na ini toh wa ka sorkar hap su ko T. 580 klur ha ki 10 snem, katwa lada ekti wow pynlai ya ki Circle cha ka REC ka sorkar daw rap stiñ ko wow su ya ka ram.
Da ong u wa ha i yaklam wa u Montri ka chnat, u James P K Sangma, wa lada ka chnat muna tangka (Finance) kwah ko u kyrchaan ya ka ram ka MeECL, ka MeECL leh hap pdiang ko ya ki kattu katni ki kyndon neibynta wow pynjanai ya i rukom krehkaam ka MeECL.
Da ong u wa ya kani ka phang daw rah biang ha ka dhab ki Montri kammon wow leh neini chaphrang heiwa da ong u wa neiliang u Montri ka chnat MeECL da kyntu u wym toh u ekti ya ki chnat krehkaam ka MeECL cha ki Company, wei ka chnat muna tangka toh u chim ko i kitkhlieh ya ka ram, deiwa pynrap wa ka sorkar daw bichaar bniah ko yeini chwa wow chim ya i rai iwa bha tam neibynta ka MeECL wa ka jylla.
