U Montri ka chnat bordiñ ka jylla, u James PK Sangma ynne ka sngi da yaklam u wa u Montri Rangbah ka jylla heiwa da kyntu u wa chwa wow chim ya kawon kawon ka rai toh wow yaklam janai bha ha ka yalang ka dhab ki Montri ka jylla khamtam hajrong i thmu wow ekti wow pynlai ya ki 2 tylli ki Distribution Circle ka MeECL cha ka REC.
Da ong u wa ynne ka sngi kiwa kitkaam ka Coordination Committee of Registered MeECL (Employees) Association and Unions (CCORMAU) da kyntu ki ya u Montri wow dam u e wow pynlai ya ki chnat ka MeECL cha ki Company, tangwa toh u pait hi da ka sorkar jylla, heiwa da pyntip u wa ha i yachem wa u Conrad da yaklam hajrong i dawa ka CCORMAU deiwa pynsñiaw leh wa ka MeECL em ko jar jiar ki sahep kiwa ye wow kreh wow pynlai ya ki Circle ka chnat.
Da ong u wa neiliang u Conrad da kular u wow chimkhia ya ini wei wow yaklam yillu mynstep ka sngi wei ngait skem u wa i yaklam daw man i iwa jop.
Ha iwi i liang u James da ong u wa ka jylla em ko chiboon i eh i khoo wei i sah ram cha ki Company saam bordiñ wa na baar jylla wei hadooh u Wisu 2020 ka ram da kynjoh ko cha ka T. 1,345 klur wa kynthup ya ka kuna wa su slem kawa 18%, wei neidaw wym ye u su ya ka ram, ki Company leh chem chitom ki wow pynbiang bordiñ.
Hadien ini ka sorkar India da wanrah ko sa ya ka Aatmanirbhar Loan neibynta wow yarap ya ki jylla wa sah i su cha ki Company saam bordiñ. Da ong u wa ka Meghalaya toh kawa boon dooh ka ram wa hap su cha ki Company lada nujor wa kiwi ki jylla ka thaaiñ mihsngi.
Heijooh i por da ong u wa ka Aatmanirbhar Loan toh ka laad neibynta ka jylla wow su ya ka ram ha ka sut wa khian kawa du 9.5% wei hawa chim ya ka ram da chimkhia leh da ka REC wa ka PFC kiwa man ki Company wow pynpoi ya ka ram cha ka DISCOM.
