Ka Coordination Committee of Registered MeECL (Employees) Association and Unions (CCORMAU) da pynsñiaw ko wa i thmu wow ekti u pynlai ya ka MeECL cha ki Company ye ko wow ktah ya ka jylla waroh kawi, wei ynne ka sngi neiliang kiwa yahkhmat ka CCORMAU deilang wa u CMD da yachem ki wa u Montri ka chnat Bordiñ hajrong ini i thmu.
U President ka CCORMAU, u Pyrkhat Marwein da pyntip u wa u Montri wa pait ya ka chnat Bordiñ, u James PK Sangma da e u yei klam che wow pyrchah ya iwon iwon i thmu wow ekti ya ki 2 tylli ki Distribution Circle ka MeECL cha ka REC wei daw yaleh u katwa ye wa ym lai ini chakhmat.
U Pyrkhat da ong u wa ka Union ym em chah khut ko wow yaklam hajrong ini i thmu wow ekti ya kitai ki Distribution Circle, tangwa da yoh yutip donhi na ka yung krehkaam u CMD kawa da pynmih ya katai ka pynbna, heiwa da pynsñiaw u yei eh iwa da pyndooh kyrmen ya ki kam ki wakreh.
Da ong u wa hadien wa da pynkylla ya ka MeSEB, da klam che wow yada ya i hok yong ki wakreh deiwa pynbha neini chakhmat, tangwa kamwa man katni, i long i man ym em man i kamtæ.
Da ong chooh chooh u wa lada ka MeECL ym ye ko wow yieñ da i yong ka hi, ki eh daw mih ki na i por cha i por wei ym ye ko wow pteiñ u thied bait ya i bordiñ, deiwa pynrap wa ka ka jylla ye ko wow pynmih kamwa 3000 MW, tangwa kamwa man katni tang 10% leh chem chitom ko wow pynmih.
U Pyrkhat da ong u leh wa ka Union ka emkaam ko ya u CMD uwa biang wei uwa ye u pait neibynta i bha lang yong waroh neibhah kam ki wakreh em ki i duna.
