Ka seiñ Southern Border Youth Welfare Association (SBYWA), East Jaiñtia Hills District ynne ka sngi da lai yachem ko wa u Dr. D. Shylla, District Medical & Health Offficer ka District heiwa da e dorkhat ha oo neibynta wow dawa wow thung Doctor chooh ha Bataw PHC neibhah kamwa man katni kani ka PHC da em ko dang du kawi donhi ka Doctor (MO) iwa da pynthut wow e chakri ya ki paaid yong ka thaaiñ khappood khamtam ha kam kani ka por khlam COVID-19 kawa dang poor ha ka jylla.
Ka seiñ SBYWA da ong ko wa katkam wa toh u man, ha man ki PHC ka sorkar lyngba ka chnat ka Health Department toh u thung noh ar ngut ki Doctor neibynta wow e yei chakri ya ki paidbah katkam ka IPHS tangwa hei yoo yong ka seiñ ka sorkar boonsien da thung da samen bait ki Doctor ha ki PHC, katwa kamtæ ini da booh ko hei eh i khoo ya ka Doctor wow ye u e chakri cha ki paidbah hei liang i chait i khiah.
Kamtæ ka seiñ SBYWA da dawa na ka sorkar lyngba u DMHO wow thung Doctor chooh ha kani ka thaw sumaar khamtam ki Doctor AYUSH khnang wow ye u e i chakri wa rap paka cha ki paidbah yong ka thaaiñ.
Chooh chooh ha kani ka sngi ka seiñ da dawa ko leh wow thung chooh chooh ya kiwa kreh kam ki Nurse, ki Staff, Health Worker, Chowkidar wa kiwi de katkam ki kyndon ka IPHS Guidelines 2012 khnang wa kani ka PHC u ye ko u e yei chakri wa paka ya ki paidbah.
Heiyatoh wa ka Natbor Sub Center, ka seiñ da yaklam ko leh wa u DMHO wow pynkrehkaam noh ya katai ka Sub Center kawa kynthup hadooh 6-7 tylli ki chnong khappood khnang wow pynsuk ko ya ki paidbah yong ka thaaiñ heiwa ya ka yung Building ka sorkar leh da dep ko wow chna da slem bha ha i thaw wa e sñiawbha da kawi ka manbei na ka chnong Natbor wei ka sorkar leh toh u thung kreh noh ko ya ka katkam i hok yong ka.
Hajrong ini waroh, neiliang u Dr. D. Shylla, DMHO Khliehriat, EJHD da kular u hakhmat kiwa kitkaam ka seiñ wow chimkhia yeini deiwa phah ya kani ka dorkhat cha ka yung krehkaam u DHS, Shillong wow leh yeiwa emkaam.
