Ka seiñ FKJGP-SEBA Circle hapoh i yahkhmat u Mathew Pajat, President, u Eladmi Suchen, General Secretary wa kiwi kiwa kitkaam ka FKJGP East Jaintia Hills wa ka FKJGP Lama Unit da hiar ki cha ka chnong Lakadong Ummat, East Jaiñtia Hills District ynne ka 10 tarik yow e yarap da ki marbaam cha ki 30 tylli ki manyung wa dooh kiwa chah ktah nei khangsbak ka sorkar neidaw ka khlam COVID-19.
Ya ki kini ki marbaam da ekti cha ka chnong lyngba u Secretary ka chnong Lakadong Ummat, u Daemiki Chadong deiwa ya emlang ki dkhot ka chnong wa ki manyung wa yoh myntoi ha ka yalang wa tbian wa pynman ha Community Hall yong ka chnong Lakadong Ummat.
Ka seiñ da ong ko wa da i bor wa khian da pyrchang ko katwa joh i bor wow yarap khamtam cha ki chnong kiwa rap duna i yoh i kot.
Ha iwi won i liang ka seiñ lyngba kani ka kyrwoh da kyntu joor ko ya ka sorkar wow pyrkhat yei chah ktah ki paidbah na i ini i khangsbak wa da dap chi bnai tam kattu.
