U BJP National Council Member, u Bashailang Khongwir da sñiaw u wa kiwa boon kiwa kitkaam ka Party hapoh jylla kwah ki wa u MLA ka Party uwa man leh u Montri ka sorkar jylla, u AL Hek wow man noh kam u President wei wa ini ymtoh iwa sih.
Yeini da pynche u Khongwir yeiwa klam u President ka Party u E Mawrie uwa da ong wa u Montri Rangbah ka Tripura man u leh kam u State President, katwa u Montri ka Nagaland leh dang ksoh u ya i kaam President deiwa kdaw leh ya ki kattu katni ki thaw heiwa ki President leh ksoh ki ya kiwi ki kaam katwa emkaam.
Da ong u wa neidaw wa i pynkhreh ya ka Election ha Meghalaya u sdang i mar sdang u snem wow wan, neiliang kiwa kitkaam ka Party ha ka ri ye ki wow chim ya i rai wow thung ya u Hek kam u President neibhah wa da man u bru wa chemphang wei da yoh u yei kyrchaan na kiwa boon kiwa krehkaam ka Party.
Neiliang u Bashailang Khongwir da ong u leh wa u Mawrie kam u President ye u wow pynemkaam yei kyrdan wow pynbait ya i sñiawthooh bakla hapoh ka Party bar wow maham pynchitom donhi ya ki dkhot yong ka.
Chooh chooh da ong u wa lada ki dkhot ka Party kamjooh kiwa kitkaam yong ka pteiñ ki wow mih na ka Party daw chem chitom wow pynlang biang ya ki neibhah kamwa man da em kamwa 25 ngut ki bru wa kongsan kiwa da mih na ka Party hapoh chi snem nadooh kiwa kitkaam hapoh ka Party ha jylla, ki District wa ki Mandal.
Da yooluti wa u President ka Party u krehkaam u chirup wa kiwa mihkhmat (MLA) wei wow pynbait ya ki kaam hapoh ka Party.
Heihooh i por da ong u wa heithaw wow pynchitom ya ki dkhot emkaam wa u President u ap u yei sñiaw wei chem yong ki dkhot wa kiwa kitkaam ka Party khnang wow pynkhlan yei rukom krehkaam yong ki deiwa pynrap leh wa da kyrmen u wa u Mawrie daw klam u ya kiwa beiñ ya u National Vice President wa State in-Charge ka Party.
