Hadien wa ki bor District ka East Khasi Hills da chah ki wow wai ya ka Iewduh nadooh ka 18 Naiynru, kiwa boon hi na kiwa chong dukan da bood ki ya ki kyndon ka sorkar lyngba ka chnat i chait i khiah wei boon na kiwa chong dukan wa kiwa chong dai ha madan dadep chim tika yada ki na u khñiang COVID-19.
Da sakhi wa kawi na ki yaw wa heh dooh ka Ri-loom Khasi Jaiñtia, ki tre dukan wa kiwa chongdai da thoh ki ‘Vaccinated’ wa ‘Not Vaccinated’, iwa pynyoo wa em ki dukan kiwa dadep chim tika wei em leh kiwa ympu chim ya i tika.
Hadien wa da elaad wow wai biang ya kani ka yaaw, na ki 550 tylli ki dukan chong madan da elaad wow wai kamwa 184 tylli chi sngi, katwa ya ki dukan da e wow wai ki jar jiar ka pali yong ki.
Neiliang u Montri ka Hima Mylliem, u MB Kharlukhi da ong u wa kamwa man katni na ki dukan wa da chah wow wai em ki kamwa 90% kiwa da dep chim tika wei hadooh ka 27 Naiynru kwia chongdai kiwa da wan chim tika na thanat Syiem em ki 2110 ngut, wei kiwa da chim tika chwa leh na ki chnong wa kiwi ki thaw em ki 754 ngut, katwa kiwa chongdai kiwa ympu em u chim tika em ki 331 ngut.
U Montri Kharlukhi da ong u leh wa katkam ka yukheiñ ha ka yung krehkaam u Syiem ka Hima Mylliem hadooh 30 Naiynru waroh kiwa chongdai kiwa da chim tika ha Iewduh em ki 2864 ngut, deiwa pynrap wa neiliang ka Hima daw thoh ko cha ki bor District wow pynsñiawthooh cha ki 331 ngut ki wym pu kwah u chim ya i tika.
Neiliang u Montri K Langstieh da kyrpaad u ya ki paidbah wow krehlang wa ka Hima deiwa bood thij ya ki kyndon wa da booh wot ya kiwa chongdai kiwa dadep chim tika.
Da e khublei kyrpang u leh ya u CEM wa ya ka EM ka KHADC, ki bor District wa kiwi kiwa da emkti wow krehlang neibynta i bha i miat ka Iewduh.
