I yabi khñiang COVID-19 da sdang hiar i ha awjan waroh ki jylla ka ri lait noh ki thaaiñ mihsngi kamjooh hapoh ka jylla Meghalaya ympu yoo ya ini i jooh i dak, ya ini da ong da u montri ka sorkar pyrdi wa pait ya ka chnat DONER, u Dr. Jitendra Singh ha ka yalang wow booddien yei man i long ka khlam kjut COVID-19 hapoh ki jylla ka thaaiñ.
Hawa yaklam wa u montri ka chnat i chait i khiah ka jylla, u Alexander Laloo Hek ynne ka sngi hajrong i pteiñ kiwa yoh ya u COVID-19 ha ka jylla, da ong u wa ka jylla Meghalaya hadooh ynne ka sngi i chim nongmuna wa i leh ya ki Test wa kiwi kiwi dang joor i wei da kdaw u leh wa i ku kiwa chah ktah ye i u man neidaw wa ka jylla dang pteiñ ko wow leh ya ki Test.
Da ong u wa emkaam leh ya i yakrehlang ki paidbah deiwa bood ryntih ya ki kyndon yada neibhah wa lada ki paidbah lai ryngkat ki wa ki kyndon wa da phah da ka sorkar i em ki bru kiwa chah ktah leh daw duna i.
Kam wow kdaw heini wa u Jitendra Singh da pyntip u wa hapoh ka thaaiñ, i em kiwa chah ktah na i poor (Positivity Rate) u COVID-19 hadooh ka 30 Naiynru toh 3.96% wei dang hiar i cha ka 2.94%, iwa pynyoo wa da sdang yaryngkat wa ka yukheiñ ha ka ri waroh kawi iwa da hiar na ka 2.34% ha ka 30 tarik cha ka 2.09% hadooh ka 2 tarik uni u bnai.
