Ka Dorbar Chnong Tympang Iawmusiang Jowai, ha kani ka kynti da kyruiñ khmat ko wow pynkup burom yaki kynhun wa thoh khubor ka Ri-loom Jaiñtia kawa tip kam ka Jaiñtia Journalist Association (JJA), kam i dak wow tipmit wei wow pynyoo yei sñiawburom yei kreh chitom yong ki neibynta u thooh wei e khubor cha ki paidbah khamtam heiyatoh wa i e khubor hajrong wow yakhun yaka khlam COVID-19.
Yaka yalang pynkup burom da pynman ha Indoor hall ka Tympang Iawmusiang heiwa u Deputy Commissioner ka West Jaiñtia Hills District, u Garod LNS Dykes da man u kam u kongsan.
U Waheh Chnong ka Tympang Iawmusiang, u E. Shylla hawa e yei klam pynsñiaw u yei burom ya kiwa thoh khubor, deiwa ong wa lyngba yong ki, ki paidbah yoh yutip ki heiyatoh waki khubor waphær waphær haka imlang sahlang. Heijooh i por sñiawburom ki leh yei yarap yong ki yaka chnong neibynta u e khubor cha ki paidbah heiyatoh wow yada naka khlam COVID-19, neibhah wa ka Tympang Iawmusiang toh ka thaw wa em ka Iawmusiang.
Neiliang u General Secretary ka Jaiñtia Journalist Association u R. Nongrum pynsñiaw u yei sñawngooh wa khroo yaka Dorbar Chnong Tympang Iawmusiang wa da tipmit ko yei kaam kiwa thoh khubor, hanla em won ki bru wa klambeiñ hei rukom waphær waphær.
Da pynrap haroh u wa hao, kam kiwa thoh khubor chem ki boon i eh hei lai luti, kamtæ emkaam ki yei yakrehlang wa i e yutip khnang yow ye u wanrah yei sur u paidbah.
U Deputy Commissioner ka West Jaiñtia Hills District hawa klam kam u kongsan da e mynsien u ya kiwa thoh khubor yow nangku ki chaphrang hei kaam, wei u wanrah leh yaki khubor wa sakhiat khlem leh iwon iwon i chah chiliang.
Da pyneh bok pyneh nasib haroh u yow nang yoh ki yei stat i chemphang neibynta u pyndep hok yei kaamram neibynta i myntoi yong ki paidbah wa boon wa lang.
