Ki dkhot yong ka seiñ National People’s Party (NPP), Dadenggre, deiwa emlang uwa mihkhmat kani ka Constituency, u James K. Sangma da wanrah ki chakhmat ya ka dorkhat ynne ka sngi yow pynsñiaw wei kyrpaad ya u Montri Rangbah, u Conrad K. Sangma yow pynku kyrdan noh ya ka Dadenggre Civil Sub-Division cha ka kyrdan District.
Ka Dadenggre Civil Sub-Division man ko kawi na ki Sub-Division kawa da rim bha kawa da seiñ nyngkong ha u snem 1982. Da boon snem da wanrah chakhmat ya ini i kyrpaad wa i dawa wow pynku kyrdan noh cha ka kyrdan District wei ka NPP deilang wa i kyrchaan yong kiwa chong chnong ka Dadenggre da yaleh ki wow kreh chitom doh wa mynsien khnang wow pynmankaam ya ini i pynku kyrdan.
U Sorojit Momin, Youth General Secretary yong ka NPP, Dadenggre Block da ong u, “Ynne ka sngi, i neiliang ka NPP Unit yong ka Dadenggre, da yachem i ya u Montri Rangbah, u Conrad Sangma wei da ekti noh ya ka dorkhat neibynta wow pynman District wa thymme ya ka Dadenggre.”
Neitæ da pynrap chooh chooh, “I sñiawkmen i wa da yoh i ya ka jubab wa biang wa kawa sñiawsuk na u Montri Rangbah.”
I e jubab u Montri Rangbah da man ko kam wa e mynsien ya ki paidbah wa chong chnong yong ka Dadenggre kiwa kreh chitom khlem da chong-ngiah neibynta i san wa i roi i paar ha waroh ki liang yong ka Civil Sub-Division.
“I sñiaw i wow e khublei chi hajar ngooh ya u Montri Rangbah yong i, u Conrad K. Sangma uwa da pynlait por khnang wow chah chkoor ya ini i pynsñiaw wa i dawa yong kani ka kynhun wei kamjooh leh wow e yei kubur wow leh ya ini,” da ong u James K. Sangma, uwa mihkhmat yong ka Dadenggre Constituency.
