theme-sticky-logo-alt
theme-logo-alt
Advertisement ad1
Advertisement ad1

Poi ka Behdeiñkhlam ka Seiñ Raij Tuber cha wakut deiwa bood kyndon

Advertisement ad1
Advertisement ad1

Ka chaad Behdieñkhlam 2021 yong ka Seiñ Raij Tuber kawa da sdang nadooh ka 16 tarik uni u bnai da poi ko cha wakut ynne ka sngi hapoh ka Syiem Aitnar yong ka chnong Tuber Kmaichnong, East Jaiñtia Hills District, hei sakhi lang u MLA ka thaaiñ u Kyrmen Shylla uwa man leh u montri ka sorkar jylla wa pait yaka chnat Social Welfare wa kiwi de, da emlang u Deputy Commissioner ka East Jaiñtia Hills District u E. Kharmalki, u Dolloi ka Elaka Jowai u Puramon Kynjing, ki heh ka District, u President ka Seiñraij Tuber u Harvis Phawa wa kiwi kiwi. 

Ka chaad Behdieñkhlam toh kawa da jooh pyndep da ki bru Pnar kiwa dang ngait haka Niamtre, wei i yumut hi yow beh yaka khlam, i kjut chitom, ki bor pynjæd pynpra ka rymaw wa ki sih wa boonjait haka imlang sahlang.  

Advertisement ad1

Ha uni u snem i pyndep ka Seiñ Raij Tuber ya ka Behdieñkhlam rap phær ko neidaw i wan ban ka khlam COVID-19, heiwa hap ki u bood ryntih yaki kyndon ka sorkar yow yada nei poor ka khlam, deiwa yajngai, deiwa deiñ Mask, wei pynduna ya kiwa chimbynta du kamwa 23 ngut chi chnong. 

Da sakhi wa wot ki rot wa jooh pynpoi palat 60 tylli hapoh Syiem Aitnar haki snem wa nachwa, ha uni u snem won da ye u pynpoi du kamwa 27 tylli.

Ki khon ka Seiñ Raij Tuber na ki chnong waphær waphær wa kynthup na waroh ar ki District kitæ ka East wa ka West Jaiñtia Hills District da wanrah ki deilang ki khubor cha ki paidbah lyngba ki rot yong ki neibynta u yakhun yei sih wa boon jait haka imlang sahlang.

Hanla hap u pynduna ya kiwa chimbynta leh, tangwa i pyndep niam Behdeiñkhlam man hi ko kawa lai bait lai ryntih, hadooh hapoh ka Syiem Aitnar deiwa chimbynta chongchit ki khon ka Raij Tuber deilang i sur ki bom ki bhuri.

U Kyrmen Shylla hawa e yei klam da e khublei Behdieñkhlam u ya waroh ki khon ka Seiñ Raij Tuber wot ki wym ye u poi ha kani ka thaw pyndep niam wa khaddooh neidaw i pynthut ka khlam COVID-19. Kamtæ booh u i kyntu yaki khon ka Raij wow mih ki chakhmat u wan chim tika khnang yow yoh biang u im kam nachwa.

Neilang u DC ka District u E. Kharmalki ong u wa ka Behdieñkhlam emyatoh bha ko wa kani ka khlam COVID-19, kamtæ yooluti u wa lyngba i ngooh Blai yong waroh ki khon ka Seiñ Raij, kani ka kjut u wiar noh ko, neibhah wym em man ko du kat i lehkmen donhi tangwa man leh i lehniam heijooh i por.

Khaddooh chwa u noh yaki rot da em i yatan bhang hapoh ka Syiem Aitnar hapyrdi ka phang wah waka phang neiñ, heiwa da jop daka phang neiñ, wei katkam i ngait, i chait i khiah wei manbha i khih i khan u em ko ha waroh kawi ka Raij.

Share this:
Previous

Dawa ka NPP wow pynku kyrdan ya ka Dadenggre Sub-Division cha ka District

Next

Ka Jowai Public School u em noh ko hapoh ka DSEL