Ka DC ka East Khasi Hills ha ka Wyrta wa da phah ko ynne ka sngi da ong wa na ki 330 ngut kiwa dang yoh COVID-19 hapoh ka District ynne ka sngi, 77.57% toh kiwa ym pu em chim yei tika chisien leh.
Na kini waroh, da em leh 3.64% kiwa da dep yoh tika pyn arsien, heiwa ka DC da ong ko wa kiwa da dep yoh tika leh dang ye ki wow yoh ya uni u khñiang tangwa katkam wa da chem, duna bha kiwa da dep yoh tika kiwa yoh ya uni u khñiang.
Da ong ko leh kiwa da dep yoh tika duna bha ka laad leh ya ki wow chah ktah joor ki lane wow hap thiah Hospital lane wow poi chadooh wow khlaad.
Na ki 330 ngut kiwa dang yoh ha ki thaw wa cha sor, 42 ngut toh kiwa da yoh tika chisien, 9 ngut kiwa da yoh tika la arsien wa 147 ngut kiwa ym pu em yoh tika. Ha ki thaw wa em cha palatsor, 20 ngut na kiwa dang yoh toh kiwa da dep yoh tika chisein, 3 ngut toh kiwa da dep yoh tika la arsien katwa 109 ngut won toh kiwa ym pu em yoh tika.
Ini mut ko wa 256 ngut kiwa dang yoh toh kiwa ym pu em yoh tika, 62 ngut toh kiwa da dep yoh tika chisien wa 12 ngut kiwa da dep yoh tika arsien.
Ini pynyoo ko wa na ki 330 ngut kiwa dang yoh, 77.57% toh kiwa ym pu em yoh tika chisien leh, 18.79% toh kiwa da yoh tika chisien katwa kiwa da yoh tika arsien kiwa chah ktah da em ki 3.64%.
Chooh chooh da pyntip wa katkam wa chem ka chnat i chait i khiah ka jylla, u jait khñiang khlam wa ktah ya ki bru katni toh u jait Delta uwa man leh uwa smat bha wow poor wei kiwa yoh ya uni u khñiang ye ki wow ku kamjooh kiwa hap wow pynthiah Hospital.
Kamtæ da kyntu ya ki paidbah wow pynmyllien ki yei rukom im deiwa yada nei poor ka khlam ha waroh ki por, u kiar nei lai i wan wa khlemkaam wei wow chim smat yei tika lada ym pu em.
Lada em kiwa yoh ya ki dak ki chin, toh u pyntip smat deiwa Phone ha u 14410 lane cha ki Zone/Block War Room lane deiwa lai cha i thaw sumaar wa em chajan dooh.
