theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1
Advertisement ad1

Hiar u Lahkmen cha Khonghlah wow pynsñiawthooh yei emkaam i tika yada COVID-19

Advertisement ad1

Hadien wa dang duna bha i wan ki bru ka thaaiñ War Jaiñtia wow chim ya i tika yada COVID-19, ynne ka sngi da pynman ya i pynsñiawthooh paidbah ha chnong Khonglah da ka yung krehkaam ka Padu State Dispensary hapoh i pynlai u Dr. Arwin Khonglah uwa man kam u In-charge yong kani ka thaw sumaar. Kam chibynta wow pynman ya i pynsñiawthooh iwa jop, da wan emlang leh da u montri ka sorkar jylla uwa man leh u MLA ka thaaiñ, u Lahkmen Rymbui.

Ha kani ka yalang neiliang u SDO ka Amlarem, u Abhilash Bharanwal, da ong u wa u COVID toh u khñiang wa da yakhun pyrchah nadooh u snem wa dadep, heiwa da em boon kiwa chah ktah wot hadooh wow dooh ki yei mynsien wa kordor tangwa katni da em ka laad wow yada wei katæ toh i tika heiwa da pynsakhiat yeini neibhah wa em palat 99% ki bru kiwa khlaad na u COVID-19 toh kiwa ympu chim ya i tika. 

U Dr. Fernandes Lamin, uwa man u Medical Officer ka Jarain PHC uwa man leh u tre chnong ka Khonglah, da ong u wa dap u dei mynsien wa sñiawkhia wa ka chnong yong oo emkaam ko wow pynman kam kani ka pynsñiawthooh paidbah khamtam neidaw wa duna bha kiwa chim ya ka tika. 

Da ong u wa oo samen ymtieñ u wow yoh COVID-19 neibhah wa da yoh u ya i tika la ar sien tangwa tieñ u ya pteiñ kani ka khlam u poor nei artatien wei kyntait ki bru wow chim ya i tika. 

U Dr. Fernandes da kdaw u ya ka dak ha i doh-ksah ka kti-tidiang ki bru waheh deiwa ong wa ki bru nachwa toh kiwa stat neibhah wa chynna jngai ki weiwa wanrah ya ki khon yong ki wow chim tika yada na ka Niangpyllu (Smallpox) wei hadooh katni da ye wow khoom u kdoh wei wow pyndoohjait ya ka kani ka jait kjut, kamtæ ngait skem u leh wa ki para chnong wa kiwi leh u wan ki chaphrang khlem em i artatien.

Neiliang u Lahkmen Rymbui hawa e yei klam da ong u wa ka sorkar Meghalaya dadep thied ko ya i dawai tika neibhah ka sorkar tip ko wa ka laad yakhun pyrkchah ya kani ka khlam toh du i tika. 

Da ong u wa ymtoh u pynyasariem ya u COVID-19 wa kiwi ki jait kjut deiwa e nongmuna wa ki bru wa baam/dih duma, dih kiad daw chitom ki samen tangwa uni u COVID-19 ktah u ya ka yung wa ki khon ki kti waroh katwa kamtæ emkaam wow pyrkhat ya ki. 

“Da yaklam ki bru ya ka Third Wave yong kani ka khlam kawa daw ktah ya ki khynnah, ileh ym hoi mo u yada i na katæ,” da ong u Lahkmen. 

Chooh chooh da ong u wa i ki bru cheini toh kiwa dooh wei manda ktah u COVID-19 da ki lak u lut hawa chah sumaar hajrong wa pynemkaam ya ka Smart Card (MHIS) katwa kamtæ da toh i por wow yada i pyn da-i ya-i hi. 

U Lahkmen da ban joor u wa waroh kwah ki wow wai noh ya ki skur ki khynnah wei oo leh kam u montri ka chnat puræ puthi da kwah u wow wai noh ya ki skur tangwa khlem chim ya i tika kammon u ye u wai, da kwah ki bru wow wai ya ki yungmane wa ki yaw ki haat tangwa ymbien won ki u chim tika. 

Ha kani ka sngi da yoh leh ya i klam na u Fr. Genesis Shangpliang, u Waheh Chnong ka Khonglah u Warning Khonglah kiwa da kyntu ya waroh ki paidbah ka chnong wow wan chim tika, wei u Secretary ka chnong, u George Lamin won da e u ya ki kyntien khublei. 

Hadien kani ka yalang pynsñiawthooh neiliang ki Doctor, ki dkhot ka chnong wa u Fr. Shangpliang da lai ki cha ki kattu katni ki yung wow yaklam pynsñiawthooh hajrong i emkaam wow chim ya ini i tika.

Share this:
Previous

Kyntu ki pulit wymtoh u pdiang ya ki phone næ ki message dawa poisa

Next

Na ki 330 ngut kiwa dang yoh COVID-19 ha East Khasi, 77.57% toh kiwa ym pu em yoh tika