Da u: Refil Sari, Mukhla Nongrim
Khynroo khyllood ka ri to tia chaphrang,
Chirup chilang kynthai wa chynrang.
Ham tieñ ham riej, cha khap ranem,
Chaphrang u tia la jop la rem.
Jar jiar ka sap u Blai da e u ha phi,
Pynyoo ha ka pyrthai, ha ka juk wa katni.
Ham swe ham tlot wei wa ham artatein,
Pynyoo ya ka sap nadooh mynsien.
Ka ri wa ka jaitbru emkaam ko ya phi,
Ya mih chakhmat khon khynroo khyllood ka ri.
Ha ka imlang sahlang ya chimbynta,
Chi sur chi dur dei mynsien wa maya.
Dei kyntien wa emburom u pynyoo ha khmat ka pyrthai,
Yow yoh yei naam i burom na bru ha Blai.
Chirup wa i akor wa i long i man wa bha,
Ha pyrthai u im yow yoh du dei maya.
Kitbok O ya phi khynroo khyllood ka ri,
Ha ki kaam wa bha to ya im sngi.
U Blai ya phi u kyrkhu khyrdoh,
Yow dap yow biang phi ha ki liang waroh.
