Ka seiñ Jaiñtia Students Movement–Eastern Region ynne ka sngi da thoh ko cha u Deputy Commissioner ka East Jaiñtia Hills heiyatoh wa i sahteiñ i kreh ya ka khilon ha Tuber Chohchrieh ya kawa da chna da i yakrehlang wa ka Star Cement.
Ka seiñ da ong ko wa ha ka 10 Naikhynde 2020 da booh ya u mooyurim ha ini i thaw da u DC warim ka District tangwa da ieh noh ya i kreh khlem pyndep wei ini da pynsihdur i ya ini i thaw heiwa uni u khilon man u leh kam uwa pdiang ya kiwa psiah cha ka District .
Kamtæ ka seiñ da dawa ko wow chna pyndep noh ya ka khilon chwa ka 16 tarik uni u bnai wei lada ym leh kamtæ ka seiñ da sliah noh ko ya ka neidaw wa da man u kam wa yoobeiñ ya ka District.
Ya kani ka dorkhat cha u DC ka District ynne ka sngi da soi da u Suni Bareh uwa man kam u General Secretary ka JSM-ER wa u Wellson PD Siangshai uwa man u President ka seiñ.
