theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1
Advertisement ad1

Da phah ya u SP wow khang ya ki karkhana Coke wa krehkaam pyrchah aiñ ha East Jaiñtia

Advertisement ad1

U Montri wa pait ya ki kaam pohyung ka jylla, u Lahkmen Rymbui da phah u ya u Superintendent of Police wow lai khang noh ya ki karkhana Coke kiwa krehkaam pyrchah aiñ ha East Jaiñtia Hills District, heiwa da phah takit u leh wa neiwon wanrah ki ya u mooyong cha kini ki karkhana.

Ini i phah u montri toh hadien wa ki dkhot ka Environment Co-ordination Committee, Elaka Sutnga wa ki paidbah ha ka 3 tarik uni u bnai da pynman ko ya i yakhih wa i lai paidbah nadooh ka Chi-Kilo chadooh u mot U Kiang Nangbah hajan ka yung krehkaam u Deputy Commissioner Khliehriat wow pyrchah ya i em kini ki karkhana hapoh ka Elaka.

Hawa yaklam won wa u montri wa pait ya ki karkhana (Commerce & Industries), u Sniawbhalang Dhar da ong u wa i kaamram ka chnat toh wow e ya ka Single Window Agency wei manda yoh ki ya ki NOC wei da pynbiang ki ya ki kot ki sla wa emkaam, i kaamram ka chnat toh wow ebor wei toh won i kaamram ka Meghalaya State Pollution Control Board (MSPCB) wa ka chnat Environment wow booddien wa ki thaw wa booh ya ki karkhana wa ymtoh u ktah ki ya ki paidbah.

Da ong u wa le tayaw chwa da khut yalang u wa ki sahep ka MSPCB hadien wa yoh ya ka ujor wei da phah sylli leh ya kini ki karkhana wei wow khang ya kiwa krehkaam pyrchah aiñ. Da ong u wa ka chnat Commerce & Industries toh kawa ebor na ka SWA, katwa neibynta ki kyndon wa ki karkhana haap bood ki toh i kaamram ka MSPCB.

U Sniawbhalang da ong u wa lada em ki karkhana kiwa kreh pyrchah aiñ, daw ujor wow kem noh ya ki deiwa pyntip leh wa ynnin ka sngi hi da phah u ya u Deputy Commissioner wow lai khang ya waroh ki karkhana wa krehkaam pyrchah aiñ ha ka thaaiñ.

Heiyatoh wa i pynpoi ya u mooyong, u Sniawbhalang da ong u wa ka chnat chwa wow ebor ko ya ki karkhana da booh ko leh ya ki kyndon wa ya ki mar poh-khyndaw khamtam u mooyong toh uwa da wanrah da ka luti wa biang neibhah ha ka jylla ym chah de wow tih ya u mooyong.

Share this:
Previous

Da pynman ya ki yung wa em ha Iongpiah kam ki Micro Containment Area

Next

Maham ka JSM wow sliah noh ya ka khilon psiah cha East Jaiñtia