Ka MBOSE ynnin ka sngi da pynbna ko ya ka Result SSLC wei kani ka sngi da man ko ka sngi wow sah kynmoo parom ya ka Iapmala Presbyterian Secondary School kawa man kawi donhi ka skur Secondary School wa e chakri ya ki paidbah ki 9 chnong ka East Jaiñtia Hills.
Kini ki 9 chnong toh ka Iapmala, Lumiarain, Suchen Mulieh, Suchen Rim, Dhana, Lumshken, Wahsarang, Shilliang Umshong wa Dienshalalu.
Kani man ko ka sien wa nyngkong dooh (First Batch) wa ki khynnah ka skur da yakhun ki ya ka Exam SSLC heiwa da lait (Pass) ki waroh wei waroh ki le ngut kiwa yakhun da yoh ki ya ka First Division.
Kini ki le ngut da yoh Distinction ki ha ka Mathematics wei kawi won da yoh Distinction ko ha ka Mathematics wa ka Health and Physical Education.
Ya kani ka skur da seiñ ha u 1994 wei kat dang mih ki por da pynku kyrdan ya ka wei ha u 2019 da sdang noh sa ya ka kyrdan Secondary School.
Hawa yaklam wa u Chairman ka SMC yong ka skur, u Preciously Lyngdoh da ong u “Nyngkong da man i burom wa khroo ya ka Balang Presbyterian wa ya ka chnong kamjooh leh e burom i ya kiwa sikai kyrpang ya ka Headteacher ka Clarify Thoo wei rap kyrpang ya ki arngut ki chipayu kiwa da esikai monsñiawbha khlem iwon iwon i su wei itæ ya u Dr. Sankey Shangpung uwa man leh u MDC wa ya u Defence Shangpung kiwa hikai Science and Technology wa Mathematic,” deiwa pynrap leh wa ymyoh kyntien de u wow e khublei ya kiwa kreh neibynta ka skur waroh kawi.
