U DC ka West Jaiñtia Hills District da pynmih hukum u ynne ka 6 tarik yow pynbna pynman Micro Containment Area ya ka Dong Um-Sahep kawa em hapoh ka Shapung Mission neidaw wa em kiwa yoh COVID-19 kamjooh weiwa em kiwa em hei maa wow yoh ya uni u khñiang namo ki High Risk Contact yow ye u leh yei booddien, ki Test, i pynchong kset wa kiwi de yow khang yei poor uni u khñiang.
Ki bru wa em hapoh kini ki Containment Area toh u neh bait ki hapoh yung, kiwa na baar ym toh u psiah wei ym chah leh wow pynman ya kiwon kiwon ki yalang paidbah.
Waroh ki dukan, ki yung krehkaam sorkar kamjooh ki yong ki bru samen u man ki kiwa khang.
Ki kari wa lai luti na kani ka Containment Area ym toh u sangeh ki chiteiñ luti. Yei pynkrehkaam ya kani ka hukum daw pait da u Incident Commander kam u Supervising Officer.
Kani ka hukum ym em khang ko yei leh ki bru ka chnat i chait i khiah yei kaam yong ki, ki wakreh u DC wa kiwi de ki bru sorkar kiwa leh ya ki kaam wym hoi u dam, kiwa thoh khubor wa kiwa li booh tadong LPG.
Kiwa leh pyrchah daw chah pynchitom ki katkam ka aiñ Disaster Management Act, 2005 waka IPC.